Міні-завод па вытворчасці самагонкі выявіла міліцыя ў Маладзечанскім раёне

Больш за 140 літраў гатовага прадукту ўжо было разліта па каністрах і захоўвалася ў гаражы, звыш 7,5 тоны брагі было ў ёмістасцях. Адпрацаваная вадкасць злівалася ва ўкапаную ў зямлю бочку. Пад самагонны завод бутлегер пераабсталяваў гаспадарчую пабудову на дачным падворку ў вёсцы Вязавец. Падчас вырабу чарговай партыі спіртнога і быў заспеты 28-гадовы мясцовы жыхар. Мужчына жыве непадалёк у гэтай жа вёсцы.

І як распавялі праваахоўнікі, у лютым гэтага года тут міліцыя Маладзечна ўжо ліквідавала падпольны цэх. Гэты ж гаспадар прызнаваўся, што гоніць самагонку выключна для сябе. Тады тоны брагі знішчылі, апарат выключылі, а самагоншчыка аштрафавалі. Але прайшоў час, і завод ізноў зарабіў.