МУС: Трое мужчын рыхтавалі напад на міліцыянераў

МУС Беларусі затрымала траіх мужчын, якія рыхтаваліся да нападу на праваахоўнікаў. Галоўным фігурантам стаў 32-гадовы ўраджэнец Брэсцкай вобласці, які пражывае ў сталіцы. Ён праз знаёмых спрабаваў купіць вялікую колькасць падшыпнікаў, шарыкі ад якіх збіраўся выкарыстаць для нападу на міліцыянераў, набываў таксама піратэхніку і дымавыя шашкі. А ўжо 13 верасня знайшоў сабе ў якасці кампаньёнаў дваіх хлопцаў. Саўдзельнікаў затрымалі падчас іх сустрэчы. У машыне мужчыны знаходзіліся петарды і шашкі, балаклавы, фільтры ад процівагазаў, нож і рагатка для стральбы шарыкамі ад падшыпнікаў.

У тэлефоне галоўнага фігуранта знайшліся сведчанні яго ўдзелу ў масавых беспарадках. У паслявыбарныя дні мужчына арганізоўваў узвядзенне барыкад у раёне метро "Пушкінская", падбадзёрваў правапарушальнікаў, а працэс здымаў на відэа. Вядома, што так званы ідэйны натхняльнік пагромаў судзімы за нявыплату аліментаў, неаднаразова прыцягваўся да адміністрацыйнай адказнасці, а па жыцці перабіваецца падзаробкамі. Зараз усе трое затрыманыя.