Некалькі рыбакоў Мінскай вобласці няўдала адкрылі сезон

Ратавальнікі папярэджваюць пра небяспечны тонкі лёд. А тым часам сотні рыбакоў з надыходам марознага надвор'я адправіліся на вадаёмы. Ледзяное покрыва пакуль недастаткова трывалае, каб вытрымаць дарослага чалавека. Так, напярэдадні ратавальнікі выцягнулі з халоднай вады мужчыну. Ці варта чакаць добрага ўлову на тонкім лёдзе? Матэрыял Аляксандра Хараўца.

Вось так звычайна і трапляюць рыбакі пад лёд, нягледзячы на вопыт, узрост і вагу. Халодная вада імгненна скоўвае цела, і чалавек упадае ў паніку. Максімум 15 хвілін - і ўжо нічым не дапамагчы.

Алег Кавальчук у ролі тапельца бывае мінімум тры разы за халодны сезон. І кожны раз яго выратоўваюць. Аднак гэта вучэнні. Таму хэпі-энд тут прапісаны па сцэнарыі. Сам жа заўзяты аматар зімовай рыбалкі прызнаецца: з вудачкай на лёд выходзіць толькі пасля таго, як таўшчыня покрыва на вадаёмах перавышае 10 сантыметраў.

А вось гэты мужчына так жадаў злавіць тую самую залатую рыбку, што па ўсёй верагоднасці забыўся пра правілы элементарнай бяспекі. Вада ж нават у цвёрдым стане памылак не даруе. Праваліўся пад лёд. Добра, што побач былі ратавальнікі і выцягнулі рыбака.

Аднак нават такія сумныя гісторыі не пужаюць самых заўзятых аматараў зімовай рыбалкі.

Пакуль жа і ратавальнікі, і супрацоўнікі Асвода могуць толькі папярэдзіць аб небяспецы. І нагадаць рыбакам, што дома іх чакаюць сем'і.

Ну а калі ўсё ж такі чалавек праваліўся пад лёд, то ў першую чаргу яго неабходна сагрэць і абавязкова даставіць у бальніцу.

Паводле афіцыйнай статыстыкі, з надыходам маразоў ахвяр тонкага лёду у цэнтральным рэгіёне пакуль ратавальнікі не фіксавалі. І калі людзі будуць прытрымлівацца элементарных правілаў бяспекі, то абавязкова вернуцца дадому.