Працягваецца разгляд крымінальнай справы па факце смерці Аляксандра Коржыча

Мінскі абласны суд у выязным пасяджэнні працягвае разгляд крымінальнай справы па факце смерці Аляксандра Коржыча. Пракурор тры з паловай гадзіны зачытваў абвінавачанне. Юрый Шарснёў пералічыў усе эпізоды атрымання хабараў і перавышэння службовых паўнамоцтваў абвінавачанымі.

На лаве падсудных трое вайскоўцаў навучальнага цэнтра ў Пячах: Яўген Бараноўскі, Ягор Скуратовіч і Антон Важэвіч.

Яны абвінавачваюцца адразу па трох артыкулах Крымінальнага кодэкса: "Перавышэнне ўлады, што пацягнула цяжкія наступствы - давядзенне да самазабойства”, "Атрыманне хабару" і "Крадзеж". На працэсе прысутнічаюць мама і бабуля загінуўшага салдата. Таксама сёння ў суд з'явіліся 22 вайскоўцы, але гэта няпоўная колькасць пацярпелых. Астатнія будуць выкліканыя на працэс пазней. Абвінавачаным па справе пагражае да 12 гадоў пазбаўлення волі.