У Гродне супрацоўнікі міліцыі выратавалі на пажары двух чалавек

Узгаранне адбылося ў адной з кватэр жылога дома насупраць Кастрычніцкага РАУС. Сёння ўначы полымя ў акне ўбачылі супрацоўнікі патрульна-паставой службы, якія вярталіся дамоў пасля змены. Далажыўшы аб здарэнні ў дзяжурную часць, яны накіраваліся да кватэры. Пакуль адны міліцыянеры спрабавалі адчыніць дзверы, другія (яшчэ да прыбыцця ратавальнікаў) праз выбітае акно з вогнетушыцеляў здолелі збіць полымя.

У кватэры былі мужчына і жанчына без прытомнасці. Іх перадалі медыкам. Пацярпелыя былі п'яныя. Папярэдняя прычына ўзгарання - курэнне ў ложку.