У Іванаве грамадзянін Расіі раніў нажом міліцыянера

Паведамляецца, што сілавікам паступіла інфармацыя, што ў горад Брэсцкай вобласці збіраецца прыехаць замежнік з мэтай учыніць асоба цяжкае злачынства. Аператыўнікі ўзялі 54-гадовага мужчыну на чыгуначнай станцыі. Аднак падчас спецаперацыі падазроны аказаў актыўнае супраціўленне. З патаемнай кішэні ён дастаў нож і некалькі разоў ударыў міліцыянераў. Адзін з супрацоўнікаў у бальніцы. У яго нажавыя раненні шыі, жывата і грудзей.

Пры вобыску ў рукзаку расіяніна знайшлі сякеру, чорную маску, адмычкі і прадукты. Дарэчы, раней падазроны ўчыніў злачынства і пасля адбыцця пакарання ў ліпені 2020 года быў прымусова высланы пад канвоем з краіны. Акрамя гэтага, ён неаднаразова прыцягваўся да адміністрацыйнай адказнасці. Крымінальная справа ўзбуджана паводле артыкула "Замах на забойства двух асоб, у сувязі з выкананнем імі службовай дзейнасці".