У Стаўбцоўскім раёне працягваецца вакцынацыя хатніх жывёл

Вакцынацыя хатніх жывёл працягваецца ў Стаўбцоўскім раёне, дзе напярэдадні мясцовыя ўлады ўвялі карантын з-за шалёнага ваўка.

Сотні хатніх сабак і катоў штодня прышчапляюць ветэрынарныя станцыі. Іх праца ў Стоўбцах падоўжаная да 8 гадзін вечара, каб і пасля працы можна было прывезці гадаванцаў. Вірус шаленства ў жывёлін не лечыцца, а захворванне ў чалавека можа прывесці да смерці.

Пасля нападзення ваўка ў бальніцы па-ранейшаму застаюцца 4 чалавекі, адна з пацярпелых - у рэанімацыі ў цяжкім, але стабільным стане.