Ансамбль "Каханачка" гастралюе з каларытнымі нумарамі

Звычайная каса, граблі, пустыя бутэлькі і чыгункі. Удзельнікі ансамбля "Каханачка" з Лідскага раёна ператварылі гэтыя рэчы ў музычныя інструменты. Свае выступленні сельскія артысты суправаджаюць гукамі бытавых прадметаў, што толькі дадае нумарам каларыту. З такім незвычайным рэпертуарам самадзейны калектыў праехаў з гастролямі ўсю Гродзенскую вобласць, не аднойчы выступаў у Польшчы і Літве. Як гучаць звычайныя бытавыя прадметы - паслухаў Юрый Карняловіч.

Падрыхтоўка да рэпетыцыі народнага ансамбля "Каханачка" больш нагадвае расстаноўку экспанатаў музея сялянскага побыту. Замест музычных інструментаў у руках удзельнікаў калектыву пральнік для бялізны, чыгуны і лыжкі. Менавіта з іх дапамогай артысты з Мажэйкава аздабляюць гукавое суправаджэнне канцэртных нумароў. Эксперыменты з бытавымі прадметамі працягваюцца ўжо некалькі дзесяцігоддзяў. За гэты час, жартуюць музыкі, назбіралася на цэлы аркестр.

Адметнасць гэтага калектыву - незвычайныя інструменты. Напрыклад, такія, як бутэлькі, збаны, граблі, тарка і нават сапраўдная каса. Да сённяшняга дня ёй косяць траву, а падчас канцэртаў выкарыстоўваюць у якасці музычнага інструмента.

Каб змайстраваць ударную устаноўку, прыйшлося перабраць не адзін дзясятак чыгункоў розных памераў. У выніку рытм адбіваецца не горшы, чым на сапраўдных барабанах.

У калектыве - аматары народнай музыкі з усіх навакольных вёсак. Прафесійна займаюцца вакалам усяго некалькі чалавек. Аднак гэта не перашкаджае ансамблю гастраляваць па ўсёй Гродзенскай вобласці, не аднойчы выступалі і ў суседніх краінах.

Нягледзячы на ўсе новаўвядзенні, цэнтральнае месца ў калектыве ўсё ж такі займае гарманіст. Юрый Шмара ўпершыню выступіў з "Каханачкай" яшчэ ў 8-м класе. Хлопец добра валодаў інструментам, і яго проста запрасілі падыграць. З таго часу не прапусціў ніводнага канцэрта.

Склад ансамбля мяняўся. З 1981 года, а менавіта тады адбылося першае выступленне ў сельскім клубе, змянілася не адно пакаленне артыстаў. Алена Коўш прыйшла ўсяго некалькі месяцаў таму. Аднак свой інструмент асвоіла добра.

Калектыў "Каханачкі" імкнецца крочыць у нагу з часам. Разам з класічным беларускім рэпертуарам не адмаўляюцца і ад імправізацый.

У планах сельскіх артыстаў - сыграць на сваіх інструментах і сусветна вядомыя хіты. Зараз актыўна падбіраецца такі рэпертуар.