У Гродзенскім заапарку рыхтуюцца да прыходу халадоў

Асаблівае меню, вітаміны і цёплыя вальеры. У Гродзенскім заапарку рыхтуюцца да прыходу халадоў. Для марозаўстойлівых жывёл супрацоўнікі рыхтуюць дадатковую падсцілку з саломы і бялковае харчаванне. Экзатычныя ж насельнікі пераводзяцца ў закрытыя памяшканні, дзе тэмпература не апускаецца ніжэй за 25 градусаў. Меньш актыўнымі сталі і мядзведзі, праўда, засыпаць на зіму яны не збіраюцца, аднак у вальеры сталі выходзіць рэдка.

Юрый Карняловіч пра ўсё падрабязна. Галоўным індыкатарам прыходу халадоў у Гродзенскім заапарку з’яўляюцца мядзведзі. Сёння гэта адзін чорны барыбал, два бурыя і сям’я з трох гімалайскіх мішак. Дзякуючы цёплай восені наведвальнікі маглі назіраць за імі амаль на месяц больш. Звычайна касалапыя рыхтуюцца да зімы яшчэ ў кастрычніку. Праўда, на волі мядзведзі засынаюць у бярлозе да вясны, а ў заалагічным парку проста менш рухаюцца і амаль не выходзяць у вальер. Аднак месца для зімоўкі супрацоўнікі ўсё роўна рыхтуюць.

Асаблівы клопат у супрацоўнікаў заапарка выклікаюць цеплалюбівыя жывёлы. Убачыць іх у адкрытых вальерах зараз практычна немагчыма. Напрыклад, малпы з пачатку лістапада грэюцца ў закрытых памяшканнях. Змяніўся для іх і рацыён харчавання. Разам з традыцыйнымі бананамі сілкуюцца гарачым чаем. Не адмаўляюцца і ад звычайнай цыбулі ў прафілактычных мэтах.

Аднак не ўсе цеплалюбівыя жывёлы і птушкі плануюць перачакаць маразы ў цёплых памяшканнях. Некалькі мясцовых буслоў ужо на працягу многіх гадоў адмаўляюцца адлятаць у вырай і прагульваюцца па вуліцы нават пры мінусавых тэмпературах. Ёсць у Гродзенскім заапарку і жывёлы з паўднёвых краін, якія добра адаптаваліся да беларускіх кліматычных умоў. Напрыклад, персідскі леапард. У прыродзе ён нават снегу не бачыў, а тут добра сябе адчувае і ў 20-градусны мароз.

Львы і страусы таксама з задавальненнем гуляюць у любое надвор’е. Афрыканскія жывёлы да зімы назапасілі тлушчу і адмаўляюцца пераходзіць у цёплыя вальеры. Менавіта збалансаванае харчаванне дазваляе насельнікам заапарка без наступстваў дачакацца вясны. Для кожнай жывёлы ветэрынары распрацавалі сваё меню. Пры моцных маразах карміць абяцаюць па пяць-шэсць разоў на дзень.

У зімовы перыяд насельнікі заапарка будуць меньш актыўнымі, аднак не меней цікавымі для наведвальнікаў. Кампенсаваць станоўчыя эмоцыі супрацоўнікі плануюць шматлікімі забаўнымі праграмамі.