У Шчучыне актыўна развіваюць вырошчванне шампіньёнаў у прамысловых маштабах

Год таму тут пабудавалі першы комплекс па вытворчасці грыбоў, сёння ўведзены ў строй аналагічны завод. Інвестыцыі ў далікатэсы зрабіла прыватная кампанія. Прадукцыя атрымалася экспартаарыентаванай і ўжо карыстаецца вялікім попытам у краінах СНД. Магутнасці дазваляюць рэалізаваць больш за чатыры тысячы тон шампіньёнаў за год. Акрамя таго, у райцэнтры з’явілася каля 200 новых рабочых месцаў.

Маштабы грыбнога бізнесу ацаніў Юрый Карняловіч. Таццяна Галавач - грыбнік са стажам. Аднак жанчына і ўявіць не магла, што збор грыбоў стане яе прафесіяй. Роўна год таму, калі ў райцэнтры адкрылася першая фабрыка па вырошчванні шампіньёнаў, прыйшла на вытворчасць. А пасля ўводу ў эксплуатацыю другога комплексу адной з першых перайшла ў новы цэх. Прызнаецца, навыкі ціхага палявання дапамаглі асвоіць экзатычную прафесію грыбавода.

Інвестыцыйны праект па вырошчванні шампіньёнаў у Шчучыне рэалізавала прыватная кампанія. Справа аказалася настолькі прыбытковай, што ўжо праз некалькі месяцаў пачала працаваць, па сутнасці, яшчэ адна новая фабрыка. Зараз магутнасці комплексу дазваляюць збіраць да пяці тысяч тон далікатэсу за год. Прычым пераважная большасць прадукцыі адпраўляецца на экспарт.

Вытворчасць грыбоў - тэхналогія, адпрацаваная гадамі. Грыбы растуць у спецыяльных камерах, дзе падтрымліваюць адмысловы мікраклімат. Галоўны складнік добрага ўраджаю - якасная вада. Шампіньёны любяць вільгаць. Чым больш вады, тым больш грыбоў. За суткі яны могуць вырастаць роўна ў два разы.

Прадпрыемства па вырошчванні грыбоў для невялікага райцэнтра мае вялікае сацыяльнае значэнне. Тут створана каля 200 новых рабочых месцаў. Работнікаў падвозяць нават з суседніх раёнаў. Тэрэса Маркелевіч, напрыклад, у Шчучын кожны дзень прыязджае з Радуні, а гэта 90 кіламетраў толькі ў адзін бок.

Мець спецыяльную кваліфікацыю на фабрыцы не трэба. Новай прафесіі грыбавода навучаюць непасрэдна на месцы. Некалькі заняткаў - і работнікі накіроўваюцца на плантацыі. Галоўнае - зразумець, якія шампіньёны ўжо маюць таварны выгляд, а якія могуць пачакаць да наступнага збору.

У перспектыве інвестары плануюць развіваць вытворчасць. Зараз распрацоўваецца будаўніцтва новых комплексаў. Паралельна вывучаецца попыт на шампіньёны на рынках еўрапейскіх краін.