Дайджаст навін Магілёўскага рэгіёна

Магілёўскі раддом пасля рэканструкцыі прыняў першых пацыентаў. А на абласным свяце "Дажынкі" ўшаноўвалі лепшых хлебаробаў вобласці. Усходні рэгіён сёлета зрабіў стаўку на азімыя культуры і плануе атрымаць каласальны прыбытак.
Галоўныя падзеі тыдня - у матэрыяле Андрэя Ястрабава.

Пасля маштабнай рэканструкцыі прыняў першых пацыентаў магілёўскі раддом. Новыя аперацыйныя, сучаснае абсталяванне вядучых кампаній, у тым ліку наркозна-дыхальнае. Інкубатары для нованароджаных закрытага і адкрытага тыпу. Транспартная рэанімацыйная сістэма. Умовы для мам і немаўлят цяпер адказваюць сусветным стандартам. З’явілася магчымасць прымаць усе віды родаў, у тым ліку партнёрскія. Да значнай падзеі на свет з’явіліся 8 дзетак - тры хлопчыкі і пяць дзяўчынак.

Магілёўскі палац культуры стаў пляцоўкай абласнога свята працаўнікоў вёскі "Дажынкі". На якім традыцыйна падводзяць вынікі сельскагаспадарчага года. Вялікі кірмаш з нацыянальнымі прысмакамі, выставамі майстроў народных рамёстваў, канцэртамі заслужаных калектываў - сведчанне захавання і развіцця народных традыцый. Знайшлося месца і для сэлфі з навінкамі беларускай тэхнікі. І, зразумела, узнагароды. Іх атрымалі лепшыя з лепшых, хто унёс сёлета значны уклад у агульны каравай краіны. Ад рэгіёна - 930 тысяч тон зерня. У лідарах - Шклоўскі, Круглянскі і Кіраўскі раёны.

Значны зачын зрабілі аграрыі Магілёўскай вобласці і на год наступны. Стаўка - на азімыя культуры. У тым ліку жыта і трыцікале. Агульныя пасяўныя плошчы павялічылі амаль на 25 %. І ва ўсіх сельскагаспадарчых прадпрыемствах. І не выпадкова, запэўнілі спецыялісты гаспадаркі "Рассвет" Кіраўскага раёна. Напрыклад, гэтае поле пад 90 га з "Аўгусцінай" - беларускім сортам азімай пшаніцы - здольна даць ураджай пад тысячу тон.

Павялічаць у Магілёўскай вобласці і плошчы пад яравыя культуры, у тым ліку кукурузу.