Сюжэт-дайджэст навін Магілёўскага рэгіёну

1800 юнакоў Магілёўскай вобласці папоўняць сёлета Узброеныя сілы Беларусі. Адну з паліклінік Магілёва абсталявалі спецыяльнай навігацыйнай сістэмай для людзей з абмежаванымі магчымасцямі. Мільён рублёў выдаткаваны з абласнога бюджэту для добраўпарадкавання прытока Дняпра. Андрэй Ястрабаў - пра значныя падзеі ўсходняга рэгіёна больш падрабязна.

У канчатковую стадыю ўступіла восеньская прызыўная кампанія. Пачалася адпраўка маладога папаўнення ва Узброеныя сілы краіны. Па традыцыі першымі навабранцаў прымуць элітныя войскі: часці сіл спецаперацый - 5-я асобная і 103-я паветрана-дэсантная брыгады. У Магілёве цэнтрам урачыстасці стала плошча Славы, дзе ўшанаваны імёны герояў Вялікай Айчыннай і працоўнага подзвігу. Удзельнікі мітынгу ўсклалі кветкі да Вечнага агню. Да навабранцаў звярнуліся прадстаўнікі духавенства, вайскоўцы і бацькі. Выступілі і байцы спецпадраздзяленняў.

Яшчэ адзін прыток Дняпра ў Магілёве набудзе добраўпарадкаваны выгляд - рачулка Дзебра. З абласнога бюджэту на гэтыя мэты выдаткаваны мільён рублёў - ачыстку рэчышча (яно стане больш глыбокім), укладку асфальту па вуліцы Катоўскага, падрыхтоўку газонаў. У будучыні рачулка стане камфортным месцам адпачынку гараджан.

Спецыяльная навігацыйная сістэма для людзей з праблемамі зроку працуе на базе другой магілёўскай паліклінікі. Дастаткова спампаваць спецыяльную праграму на тэлефон, і ён стане незаменным спадарожнікам. Прынцып работы просты - як у навігатары для аўтамабілістаў, праграма голасам падкажа, у якім напрамку ісці, каб трапіць да ўрача. Да таго ж усталявана гукавая сістэма на паверхах, якая не дазволіць згубіцца. А кабінеты падпісаны шрыфтам Брайля.

Незвычайны падарунак зрабіў сваёй малой радзіме знакаміты беларускі мастак Віктар Альшэўскі. Ён прэзентаваў у Магілёве "Вавілонскую вежу" - менавіта яе нагадвае металічная канструкцыя з паўсотняй твораў аўтара розных форм і памераў з выявамі гістарычных помнікаў і эпох. Выстава працягнецца да Каляд, а потым адправіцца ў вандроўку па свеце.