У Полацку прайшоў I Міжнародны лясны фестываль

Яны па-майстэрску працуюць з дрэвам, спаборнічаюць у валцы ствалоў на хуткасць і добра ведаюць мову лесу.
Больш за сто прадстаўнікоў з Беларусі, Расіі, Літвы, Латвіі і Эстоніі сабраў у Полацку I Міжнародны лясны фестываль. Яго ўдзельнікі - будучыя работнікі лясной галіны, але ўжо сёння студэнты і навучэнцы профільных устаноў дэманструюць добрыя практычныя навыкі і тэарэтычную падрыхтоўку. Вольга, відавочцам якіх спаборніцтваў сталі вы?

Распілоўка дрэў на хуткасць, выпрабаванне лесам, валка ствалоў з ювелірнай дакладнасцю - гэта не поўны спіс заданняў, якія падрыхтавалі арганізатары. Цікава, што ў такой на першы погляд нежаночай справе перамогу аспрэчвалі і дзяўчаты.

Ад гулу бензапіл не чуваць ні слова, але гэта ім зараз і не трэба. Удзельнікі максімальна сканцэнтраваны на справе: зробленыя імі спілы не павінны нават стрэмкі пакінуць.

Упраўляцца з інструментам трэба не толькі акуратна, але і хутка: секундамер у руках суддзяў адлічвае час. У гэтай справе сябе спрабуюць і дзяўчаты: чаму не, калі яны, як і іншыя ўдзельнікі I ляснога фестывалю, будучыя леснікі?! Таму і ў квест па пушчы не баяцца адправіцца. У камандзе Петразаводскага лесатэхнічнага тэхнікума пераважна менавіта дзяўчаты. Кажуць, у Карэліі, адкуль яны прыехалі, няма ніводнага чалавека, хто не любіць лес. Але хто ведаў, што наперадзе выпрабаванне беларускімі балотамі? Выкупаліся, але перашкоду пераадолелі.

Усяго ў лясны квест адправіліся 15 каманд. Маршрут працягласцю тры кіламетры трэба пераадолець не больш чым за гадзіну. Дзесяць прыпынкаў, але не дзеля адпачынку: на кожным выпрабаванні. Тэорыя: трэба ўспомніць лацінскія назвы дрэў і вызначыць жывёлу па рагах і скуры. Практычныя: вызначыць на вока адлегласць да тычкі і глебавыя гарызонты.

Не ўсё атрымалася так, як таго хацелі, у хлопцаў з каманды Каўнаскага каледжа лесаводства. Але настрой штрафныя балы не сапсавалі. На такім масштабным фестывалі прафесійнага майстэрства яны ўпершыню. Будзе што ўспомніць.

Акрамя ўражанняў, леснікі-пачаткоўцы атрымалі вопыт. У кожнага наперадзе няпростая праца: берагчы галоўны рэсурс Зямлі - лес.