Радыё "Сталіца"

Радыё "Сталіца" - адзіная рок-радыёстанцыя ў краіне, якая вяшчае на беларускай мове!

Плэй-ліст радыёстанцыі гучыць у эфіры на хвалі 105,1 FM у Мінску і на дадатковых 25 FM-перадатчыках па ўсёй Беларусі.

Фармат радыёстанцыі накіраваны як на вопытнага меламана, выхаванага на класіцы рок-музыкі, так і на маладога чалавека, які толькі пачаў слухаць рок і сачыць за айчыннымі і замежнымі навінкамі.

Прамую радыётрансляцыю можна слухаць на афіцыйным сайце.

У эфіры трансліруюцца пазнавальныя, адукацыйныя, музычна-забаўляльныя праграмы і шоу. Адмысловае месца займаюць праекты, прысвечаныя гісторыі і культуры Беларусі, дзякуючы якім можна віртуальна падарожнічаць па цікавых мясцінах нашай краіны, даведвацца пра ўнікальныя прыродныя рэсурсы і помнікі архітэктуры, а таксама здзяйсняць віртуальны экскурс у гісторыю і знаёміцца з багатай культурнай спадчынай Беларусі.

Праекты і падкасты вы можаце не толькі паслухаць, але і паглядзець на афіцыйным YouTube-канале радыёстанцыі.

Радыё "Сталіца" мае асаблівы, нестандартны падыход да фарміравання музычнай сеткі. Почырк радыёстанцыі знаходзіцца на стыку фарматаў AOR/AS (альбомны рок/сучасная музыка для дарослых) і прадстаўлены кампазіцыямі найлепшых рок-выканаўцаў.