Бальнічныя клоўны з шасці краін прыехалі ў Гомель

Бальнічныя клоўны з шасці краін прыехалі ў Гомель правесці майстар-класы для калег з Беларусі і ўзняць настрой маленькім пацыентам медустаноў.

Якія метады клоўнатэрапіі выкарыстоўваюць у Еўропе, што беларускія валанцёры перанялі за гэтыя дні - ведае Ганна Кавалёва. Яны не ўрачы і на здароўе не скардзяцца, аднак у бальніцах праводзяць палову свайго жыцця. Бальнічныя клоўны міжнароднага фонду - прафесійныя акцёры. Прыехалі з Аўстрыі, Венгрыі, Славеніі, Даніі, Швецыі і іншых краін. Моўны бар'ер не перашкода: з маленькімі пацыентамі Гомельскай абласной дзіцячай бальніцы размаўляюць асаблівым клоўнскім спосабам.

Знізіць трывогу, ліквідаваць страх і расслабіць. Іх задача - рассмяшыць дзіця перад уколам або складанай аперацыяй. Прычым аб тэрапеўтычным эфекце смеху кажуць і супрацоўнікі бальніцы. Заўважана: пасля візітаў клоўнаў у дзяцей паляпшаецца не толькі настрой, але і аналізы.

Гадзіннае шоу ў актавай зале, затым марафон па палатах, дзе знаходзяцца самыя слабыя пацыенты. З сабой увесь неабходны рэквізіт.

Яркі касцюм, багаж гумарыстычных гісторый і, вядома, чырвоны нос - галоўныя атрыбуты бальнічнага клоўна. Аднак далёка не ўсе.

Без псіхалагічнай устойлівасці нельга. Часам даводзіцца працаваць з цяжка хворымі дзецьмі, а рассмяшыць такіх, тым больш у бальнічных сценах, а не на цыркавой арэне, вельмі складана. Таму ў клоўнатэрапію прыходзяць многія, застаюцца адзінкі.

У Еўропе іх візітам у бальніцы ўжо не здзіўляюцца. У нас гэты кірунак пакуль не так развіты. Сярод адрозненняў: у ліку валанцёраў не прафесійныя акцёры, а часцей аматары. Падзяліцца вопытам, назапашаным за дзесяцігоддзі, - яшчэ адна місія замежных клоўнаў.

Гомель стаў першай адукацыйнай пляцоўкай. Бясплатныя майстар-класы па асновах клоўнатэрапіі прайшлі для медыкаў і супрацоўнікаў Чырвонага Крыжа. У навучальнай праграме – незвычайныя методыкі рэабілітацыя дзяцей з дапамогай гульнявой і арт-тэрапіі.

Наступным абласным цэнтрам, дзе пройдуць майстар-класы, стане Віцебск. Затым бальнічныя клоўны адправяцца ў Мінск.