Новы віцэ-прэм'ер - Юрый Назараў. Што мы пра яго ведаем?

Вернемся да нафтавай эканомікі, якую падрабязна абмяркоўвалі ў Палацы Незалежнасці ў аўторак.

На грунтоўную гутарку па нафце наўпрост з кабінета Прэзідэнта прыйшоў новы віцэ-прэм'ер Юрый Назараў. Яго папярэднік на адказнай пасадзе Ігар Ляшэнка пераходзіць на іншую працу. Якую - пакуль не афішуюць.

Для Юрыя Назарава новая пасада - павышэнне. Да гэтага ён амаль 6 гадоў працаваў на чале не самага простага канцэрна - "Беллеспаперпрам". Цяперашняя праца - а зараз ён курыруе ва ўрадзе нафтахімічны комплекс - сапраўды не больш простая. Уключыцца прыйшлося імгненна!

Зрэшты, здольнасць унікаць у дэталі, уменне настроіць калектыў на рабочы лад, прынцыповасць у справах, наватарскі падыход - усё гэта моцныя бакі новага віцэ-прэм'ера. Так гавораць яго калегі. Дысцыплінаваны сам - таго ж патрабуе ад каманды! Юрыю Назараву 58 гадоў. Ён атрымаў адукацыю ў Беларускім тэхналагічным інстытуце і Акадэміі кіравання. Доўга працаваў у лясной гаспадарцы - там атрымаў вопыт і загартоўку. Пачынаючы з 2001 года, на кіруючых пасадах, адказваў за лес, вядома, але курыраваў менавіта прамысловую вытворчасць.

На час яго працы кіраўніком канцэрна прыпаў звышнапружаны перыяд завяршэння мадэрнізацыі дрэваапрацоўкі і будаўніцтва новых цэлюлозна-папяровых вытворчасцяў. Так што, прамысловасць - гэта яму блізка і зразумела! Цікава, што такі шлях - у рэальны сектар - у сям'і выбраў толькі ён. Блізкія новага віцэ-прэм'ера - у асноўным медыкі!