Рабочыя сустрэчы Аляксандра Лукашэнкі

Міністр нагадаў аб сур'ёзнай задачы для нашага знешняга гандлю: прыкладна трэць прадукцыі павінна пастаўляцца на рынкі далёкай дугі. І праца ў гэтым кірунку актыўна вядзецца. Напрыклад, ёсць дамоўленасць аб лакалізацыі беларускіх прамысловых гігантаў - Гомсельмаша, МТЗ і МАЗа ў Індыі. Аб гэтым у Нью-Дэлі па выніках перамоў лідары краін умовіліся яшчэ ўвосень, калі Аляксандр Лукашэнка наведваў Індыю з візітам. На тыдні парламенцкая дэлегацыя з гэтай дзяржавы Паўднёвай Азіі прыбыла ў Мінск і ў бакоў з'явілася магчымасць яшчэ раз акінуць поглядам увесь спектр двухбаковых адносін.

Госці правялі перамовы ў Нацыянальным сходзе. Парламенты Беларусі і Індыі рэалізуюць сумесны праект у адукацыі. А таксама наведалі Парк высокіх тэхналогій.

На сустрэчы ў Палацы Незалежнасці ішла размова аб тым, што Мінску і Нью-Дэлі варта больш рашуча развіваць эканамічныя адносіны. Такі акцэнт зрабіў Аляксандр Лукашэнка. У прынцыпе, узаемная дынаміка радуе. Летась тавараабарот наблізіўся да паўмільярда долараў.

Але разлічваюць на большае - напрыклад, на эфект ад стварэння сумесных прадпрыемстваў. Такія ў перспектыве могуць з'явіцца ў беларуска-індыйскім парку. Прапрацоўваецца магчымасць стварэння зручнага для краін лагістычнага і прамысловага кластара пад Оршай.

Можна сказаць, што ўвесь мінулы тыдзень - гэта дні вялікай парламенцкай дыпламатыі ў Беларусі. Народныя выбраннікі, апроч законатворчай дзейнасці, усяляк спрыяюць і прасоўванню супрацоўніцтва на міжнароднай арэне. У Мінску прымалі і гасцей з сената Олій Мажліса Узбекістана. Так у гэтай дзяржаве называецца верхняя палата парламента.

Трактары, сельгасмашыны, дарожная і будаўнічая тэхніка складаюць ільвіную долю беларускага экспарту ў гэтую краіну. Бізнес-колы дамовіліся, што туды адправяцца і дзве сотні самазвалаў. Ва Узбекістане адкрытыя першыя зборачныя вытворчасці Амкадора і Бабруйскаграмаша. Менавіта паглыбленне прамкааперацыі - ініцыятыва прэзідэнтаў дзвюх краін. Каб узмацніць узаемадзеянне, лідары маюць намер грунтоўна пагаварыць асабіста. На гэты год запланаваны афіцыйны візіт Аляксандра Лукашэнкі ва Узбекістан.

Дарэчы, і з прэзідэнтам Узбекістана, і індыйскім прэм'ерам беларускі лідар размаўляў літаральна тыдзень таму на палях саміту Шанхайскай арганізацыі супрацоўніцтва.