Прыродны аазіс у парку "Нарачанскі" адзначае 10-годдзе

Учора тут квітнеў сланечнік, сёння час лаванды, а заўтра на прасторы пад адкрытым небам распусцяцца хрызантэмы. У парку "Нарачанскі" размясціўся "Аптэкарскі сад" - сучасны экскурсійна-турыстычны комплекс. Наведвальнікам прапануюць і палюбавацца прыгажосцю запаведнага месца, і атрымаць водаратэрапію, і прадэгуставаць фітагарбату.

Сёлета прыродны аазіс адзначае 10-годдзе. Па вераснёўскія фарбы "Аптэкарскага саду" ў Мядзельскі раён адправілася Наталля Бардзілоўская.

Амаль за 150 км ад Мінска сярод азёр Нарач, Мястра і Белае ва ўнікальным прыродным аазісе Нацыянальнага парку "Нарачанскі" размясціўся экскурсійна-турыстычны комплекс пад назвай "Аптэкарскі сад". Маляўнічае месца, дзе вока адпачывае, гледзячы на кветкі і зеляніну, дзе слых лашчаць спевы птушак, дорыць не толькі замілаванне і адпачынак. Гэта без перабольшання запаведны куток-школа беларускіх традыцый і міфалогіі, дзе на кожным кроку займальны этнаўрок ад апавядальніка-экскурсавода. А галоўнае тоіцца ў самой назве зялёнага аб'екта "Аптэкарскі сад": 10 гадоў таму было прынята рашэнне заснаваць на гэтых тэрыторыях раслінную базу для буйнога фармацэўтычнага вытворцы Беларусі.

Аптэчныя травы тут абсалютна чыстыя, бо сад знаходзіцца глыбока ў лесе, ніякіх аўтастрад побач. Людзі гуляюць па спецыяльных дарожках, хаця дапускаецца дакранацца да раслін з дазволу экскурсавода. Дотык - з карысцю. Спецыяліст акцэнтуе ўвагу гасцей на лекавых асаблівасцях кветак і траў, а таксама дае магчымасць пераканацца ва ўласцівасцях флоры.

Ганна Казакевіч - гід па ўнікальных лакацыях саду. Знаёміць з кветкавымі зонамі, паказвае арт-аб'екты. У кожнай клумбы, пад кожным дрэўцам тут свая легенда. Турыстычным групам, сем'ям у "Аптэкарскім садзе" прапануюць інтэрактывы, флэшмобы і конкурсы. У "Альтанцы шчасця" свае законы: тут трэба думаць толькі пра лепшае. У зоне "Ледніковы перыяд" растуць кветкі і травы старажытнага паходжання, ёсць нават уладарства Бабы-ягі.

Ад старажытнасці да зорак. На тэрыторыі "Аптэкарскага саду" расце дрэва з гісторыяй у 250 мільёнаў гадоў - гінкга білоба. Побач цынія - упершыню яна раскрыла сваю кветку ва ўмовах касмічнай бязважкасці. Гонар саду - "зорная" алея, дзе кусты і дрэвы высаджвалі знакамітыя госці. З апошніх - касманаўты Алег Навіцкі і Марына Васілеўская. Нават унікальныя азёры Нарач, Мястра і Белае ў садзе абыгралі ландшафтна: ёсць сажалка, дзе каралеўствуе німфея і водзіцца рыба , а таксама дэгустацыйная лакацыя з фітагарбатай . У "Аптэкарскім садзе" цікава, духмяна, смачна і нясумна!

16 красавіка тут пачынаецца турыстычны сезон, які завяршаецца глыбока ў кастрычніку. Сёлета "Аптэкарскі сад" наведалі больш за 15 тыс. чалавек. І беларусам, і замежным турыстам тут прапануюць дзясяткі тэматычных экскурсій, сеансы водаратэрапіі, фатаграфаванне ў спецыяльных шыкоўных зонах, адпачынак у кемпінгу. Тут можна проста пахадзіць басанож па траве, па газонах.

У "Аптэкарскім садзе" рады наведвальнікам і імкнуцца стварыць для іх самыя камфортныя ўмовы.