А. Лукашэнка: Прыйшоў час узгадніць дзеянні па аднаўленні вольнага перамяшчэння грамадзян у ЕАЭС

Санкцыйнаму ціску Захаду трэба супрацьстаяць разам, адзіным еўразійскім фронтам! Пазіцыю Беларусі адносна зацяжнога прэсінгу, накіраванага ў першую чаргу на Расію, сёння агучыў наш Прэзідэнт. Аляксандр Лукашэнка прыняў удзел у саміце ЕАЭС. Сустрэча чарговы раз прайшла ў анлайн-фармаце.

Да дыскусій таксама далучыліся першы Прэзідэнт Казахстана Нурсултан Назарбаеў і кіраўнікі дзяржаў - назіральнікаў пры ЕАЭС - Кубы і Узбекістана - яны атрымалі гэты статус летась.

Еўразійскі саюз заўсёды быў закліканы вырашаць пытанні садзейнічання ўзаемнаму гандлю, цеснага эканамічнага партнёрства. Але фонам гэтага года стаў новы віток палітычнай турбулентнасці і гутарка на мове санкцый. Гэта вымушае краіны ЕАЭС разам адказваць на гэтыя выклікі. Толькі ў адзінстве можна ўстаць на абарону інтарэсаў Еўразійскага саюза, забяспечыць рост эканомік краін-удзельніц, упэўнены Аляксандр Лукашэнка.

Нягледзячы на палітычны ціск, Еўразійскі саюз не павінен замыкацца на гандлі ўнутры інтэграцый. Як і раней, ЕАЭС адкрыты да развіцця адносін з любымі дзяржавамі, упэўнены Аляксандр Лукашэнка. Але пры гэтым важна развіваць сумесныя меры падтрымкі эканомік, пазбягаючы лабіраванне нацыянальных інтарэсаў.

Добры прыклад такой кааперацыі - супрацоўніцтва ў галіне лекавай бяспекі, у прыватнасці процідзеянне COVID-пандэміі. Ва ўсіх краінах стартавала вакцынацыя, яе тэмпы будуць нарастаць. Аляксандр Лукашэнка заклікаў партнёраў па саюзе да паступовага адкрыцця ўнутраных меж.

Адзін з прыярытэтаў прынятай стратэгіі - фарміраванне агульных рынкаў энергарэсурсаў. Беларускі лідар заклікаў актывізаваць гэты працэс. Прапанову сёння падтрымалі прэзідэнты Арменіі і Кыргызстана. Агульная энергетычная палітыка не павінна насіць дыскрымінацыйны характар у дачыненні партнёраў, адзначылі ўдзельнікі. Размова, у прыватнасці, пра адзіны рынак газу і тарыфы на яго прапампоўку.

Праект адпаведнай дамовы ўжо прадстаўлены расійскім бокам. Але прэзідэнты ўмовіліся выпрацаваць канчатковыя падыходы да наступнай сустрэчы ў рамках ЕАЭС.Аб гэтым па выніках закрытай часткі сённяшняга саміту паведаміў журналістам віцэ-прэм'ер Ігар Петрышэнка.

Сярод іных важных аспектаў сумеснай працы - гарантаванне ўласнай харчовай бяспекі. Важна здымаць спрэчныя моманты і розначытанні, заклікаў беларускі Прэзідэнт.

Акрамя гэтага, Аляксандр Лукашэнка заявіў пра неабходнасць больш цеснага супрацоўніцтва з Кітаем, у тым ліку па лініі экспарту тавараў і паслуг. Таксама варта прыгледзецца да краін СНД як да патэнцыяльных новых членаў і назіральнікаў у еўразійскай інтэграцыі.