На пасяджэнні Савета бяспекі Аляксандр Лукашэнка раскрыў сутнасць Дэкрэта "Аб абароне суверэнітэту і канстытуцыйнага ладу"

Роля і паўнамоцтвы Савета бяспекі павінны быць сувымерныя з тымі рызыкамі і пагрозамі, якія ставіць перад краінай час.

Пра гэта заявіў Аляксандр Лукашэнка на пасяджэнні Савета бяспекі ў Палацы Незалежнасці. Нагадаем, у савет уваходзяць не толькі сілавікі, але і кіраўнікі ўрада, абедзвюх палат парламента і Адміністрацыі Прэзідэнта. Кіраўнік дзяржавы звярнуў асаблівую ўвагу на адкрытасць працы савета: грамадства павінна бачыць і разумець усе яго рашэнні.

Раскрыў Прэзідэнт і сутнасць дакумента, які быў падпісаны 9 мая - Дэкрэт "Аб абароне суверэнітэту і канстытуцыйнага ладу". Ён прадугледжвае ў выпадку гібелі кіраўніка дзяржавы з-за замаху або знешняй агрэсіі перадачу ўсіх паўнамоцтваў Савету бяспекі. Сёння абмяркоўвалася распрацоўка новага палажэння пра гэты калегіяльны орган. Абапірацца закон будзе на Канстытуцыю, ваенную дактрыну і прававыя акты Беларусі.

Беларусь вымушана рэагаваць на відавочную мілітарызацыю суседзяў. Амаль двухразовае павелічэнне кантынгентаў НАТА і ЗША ў Польшчы і Прыбалтыцы. Плюс рэгулярныя правакацыі ўздоўж беларускіх меж на заходнім кірунку. Яшчэ і таму Савету бяспекі хочуць дадаць паўнамоцтваў па прагназаванні знешніх пагроз. Па сутнасці ў мірны час гэта будзе "калегіяльны памочнік" Прэзідэнта па нацыянальнай бяспецы. Пра гэта распавёў журналістам кіраўнік Савета бяспекі ўжо пасля пасяджэння.

Паводле слоў дзяржсакратара Савета бяспекі, такія новаўвядзенні будуць прадугледжаны новай рэдакцыяй палажэння аб Савеце бяспекі. Папярэдняе прымалі яшчэ ў 2000 годзе і надышоў час актуалізаваць дакумент. Нагадаем, што Дэкрэт "Аб абароне суверэнітэту і канстытуцыйнага ладу" Прэзідэнт падпісаў 9 мая. Ён уступіў у сілу адразу пасля падпісання - у Дзень Перамогі. Дакумент накіраваны на захаванне незалежнасці і суверэнітэту Беларусі.