А. Лукашэнка ажыццявіў рабочую паездку ў Гродзенскую вобласць

Доўгачаканая падзея для жыхароў Гродна. Сёння там адкрыты мост цераз Нёман. Зараз ён самы высокі ў Беларусі - 32 з паловай метры над узроўнем вады. Урачыстае адкрыццё прыйшлося адкласці з-за наймацнейшай стыхіі, якая абрынулася на рэгіён два тыдні таму.

Праўда, у Гродне і сёння на працягу ўсяго дня ідзе дождж, так што нібыта сама прырода настаяла, каб мерапрыемства прайшло ў такое надвор'е. Як і абяцаў, на адкрыццё прыехаў кіраўнік дзяржавы. Факт непагадзі не падмачыў ні рэпутацыю мерапрыемства, ні тых, хто мае дачыненне да гэтай вялікай будоўлі. Дажджавікі, парасоны. Хоць мостабудаўнікам не прывыкаць, яны заўсёды працуюць у найскладанейшых умовах. Гэты аб'ект для іх падстава асаблівага гонару, а дзень увойдзе ў гісторыю цэлай краіны. Удвая знамянальна, бо паспелі да знакавай даты. Новы мост стаў падарункам для жыхароў рэгіёна да гадавіны вызвалення Гродзеншчыны ад нямецка-фашысцкіх захопнікаў.

Першапачаткова гэты мост быў чыгуначным, яго пабудавалі больш за 40 гадоў таму па ініцыятыве ваенных у якасці рэзервовага аб'екта. А зараз гэта частка новага вялікага кальца вакол Гродна. Даўжыня маста каля 240 метраў, шырыня - 17 з паловай. Прадугледжаны дзве паласы руху ў кожны бок. Зялёнае святло для машын далі сёння, а грамадскі транспарт пусцяць заўтра.

А пасля кіраўнік дзяржавы сабраў на нараду ў аблвыканкаме кіраўніцтва рэгіёна. Гэтая сустрэча атрымалася на злобу дня. Прысвечана пытанням супрацьстаяння санкцыйнай палітыцы. У першую чаргу кіраўнікоў абсалютна ўсіх рангаў Прэзідэнт арыентуе на максімальны вынік у эканоміцы.

Няпроста ў любыя часы аграрыям. Зараз, нягледзячы на дождж, для іх гарачая пара. Трэба своечасова і без страт сабраць ураджай. Губернатар Гродзеншчыны Уладзімір Каранік далажыў пра ход уборачнай кампаніі ў рэгіёне, развіццё сельскай гаспадаркі і аграпрамысловага комплексу. Расце экспарт, так што гэта лепшае пацвярджэнне, што наша прадукцыя запатрабаваная на знешніх рынках. Падрабязнасці ў наступных выпусках.