А. Лукашэнка выступіў на глабальным саміце гандлю паслугамі ў Пекіне

Беларусь разлічвае на пашырэнне супрацоўніцтва з Кітаем. Пра гэта заявіў Аляксандр Лукашэнка на глабальным саміце гандлю паслугамі. Маштабны форум праходзіць у Пекіне. Гэта прыкметная падзея для дзелавога свету і КНР. Выступленне беларускага лідара прагучала ў відэафармаце, як і зварот яго калегі Сі Цзіньпіна. Наш Прэзідэнт адзначыў, што за гады моцнага сяброўства Мінска і Пекіна мы неаднаразова пераконваліся ў паслядоўнасці палітыкі Кітая. Пандэмія, закрыццё меж, разрыў лагістычных ланцужкоў, зніжэнне турыстычнай актыўнасці і рост пратэкцыянізму сталі беспрэцэдэнтным выпрабаваннем для сусветнага рынку паслуг. Але разам з тым крызіс стымуляваў бум лічбавых тэхналогій і перазагрузкі гэтай сферы.

Прэзідэнт нагадаў, што свет перажыў вялікі лагістычны калапс. Але нягледзячы ні на што, транспартная інфраструктура нашай краіны карыстаецца попытам у якасці транзітнага калідора ў рамках ініцыятывы "Пояс і шлях". За апошнія 6 гадоў амаль у паўтара дзясятка разоў павялічаны аб'ём кантэйнерных перавозак з Кітая ў Еўропу і зваротна. Тут Беларусь зарэкамендавала сябе надзейным партнёрам для Паднябеснай. Развіваць узаемавыгаднае супрацоўніцтва ў сферы паслуг у інтарэсах нашых краін Беларусь будзе і надалей.