Аляксандр Лукашэнка: На коне грамадзянскі мір і цэласнасць Беларусі

Афіцыйны Мінск выступае за нарошчванне ўзаемадзеяння ў Арганізацыі Дагавора аб калектыўнай бяспецы. У складаных сучасных умовах саюзніцва ў ваенным і палітычным вымярэннях набывае ўсё больш важкі сэнс.

Такую ацэнку цяперашняй і наступнай рабоце ў рамках АДКБ сёння даў Аляксандр Лукашэнка. Прэзідэнт прыняў удзел у саміце Арганізацыі нараўне з іншымі лідарамі краін АДКБ. Дыскусія прайшла ў анлайн-фармаце. Сёлетні год не дадае стабільнасці і ў без таго няпростае міжнароднае становішча. Абвастраецца ваеннае супрацьстаянне паміж сусветнымі цэнтрамі сілы. Дамінуе мова санкцый і пагроз. Свет стаіць на парозе развязвання некантралюемай гонкі ўзбраенняў. Ускладняе сітуацыю ў сусветнай палітыцы і эканоміцы COVID-пандэмія, абвастраючы сацыяльную напружанасць. Прэзідэнт упэўнены: за гэтай шырмай тоіцца прадуманая тактыка глабальных гульцоў. Яна накіравана на стварэнне кантралюемага хаосу і апраўданне дваістых стандартаў.

Складаная сусветная сітуацыя выклікае занепакоенасць усіх краін - удзельніц альянсу і вымушае быць напагатове. У такіх умовах тэхналогіі каляровых рэвалюцый сталі звычайнай практыкай. Беларусь усё гэта ў поўнай меры адчула на сабе, усе апошнія месяцы знаходзячыся пад беспрэцэдэнтным знешнім націскам. Прэзідэнт дэталёва спыніўся на ўнутранай сітуацыі ў краіне. Беларускі лідар адзначыў нездаровую цікавасць нашых заходніх суседзяў і бесперапынныя правакацыі ў грамадстве. Усё гэта працягвае абвастраць унутраную сітуацыю і ствараць пагрозы грамадзянскаму міру.

Удзельнікі саміту заклікалі адно аднаго да саюзніцкай падтрымкі. Яе роля апошнім часам значна ўзрасла. Толькі сумесна, збліжаючы пазіцыі дзяржаў - членаў па калектыўным рэагаванні, удасца супрацьстаяць сучасным выклікам. Аляксандр Лукашэнка заклікаў лідараў краін АДКБ у найбліжэйшы час вочна абмеркаваць пытанні бяспекі. Прычым у пашыраным фармаце. Прэзідэнт запрасіў да дыялогу і іншыя зацікаўленыя бакі, якія таксама ўсведамляюць пагрозы цяперашняга часу.