Аляксандр Лукашэнка правядзе афіцыйныя перамовы з прэзідэнтам Азербайджана

Прэзідэнт Беларусі накіраваўся з дзяржаўным візітам у Азербайджан. У Баку Аляксандр Лукашэнка правядзе афіцыйныя перамовы з прэзідэнтам Азербайджана Ільхамам Аліевым.

Сустрэча двух лідараў пройдзе ў фармаце "сам-насам" і ў пашыраным складзе - з удзелам членаў дэлегацый. Прэзідэнты разгледзяць актуальныя пытанні двухбаковых адносін з акцэнтам на пашырэнне гандлёва-эканамічных сувязяў у розных галінах і развіццё кааперацыйнага ўзаемадзеяння ў сферах прамысловасці і сельскай гаспадаркі.

Яшчэ адной тэмай перамоў стане супрацоўніцтва Беларусі і Азербайджана на міжнародных пляцоўках і ў інтэграцыйных аб'яднаннях. Кіраўнікі дзяржаў абмяркуюць сітуацыю ў рэгіёне і ў свеце ў цэлым. Па выніках перамоў будзе падпісаны пакет двухбаковых дакументаў. Чакаецца, што ў Баку Аляксандр Лукашэнка і Ільхам Аліеў таксама наведаюць азербайджанскую міжнародную сельскагаспадарчую выставу Caspian Agro, дзе азнаёмяцца з экспазіцыямі Беларусі і Азербайджана - рэалізацыяй сумесных праектаў у сферы АПК.

Гэта найбуйнейшая экспазіцыя на Каўказе. Нараўне з форумам Inter FoodAzerbaijan яна раскрывае ненафтавы патэнцыял краіны. Сярод 38-мі краін-удзельніц і Беларусь. Кампаніі дэманструюць напрамую экспартны патэнцыял і шукаюць магчымых партнёраў. Кірункі: ад кандытаркі да нафтахіміі. Угнаенні і трактары, малочныя прадукты, мяса, сельгастэхніка - палову рынку ў цэлым па краіне зараз займаюць беларусы. Наш стэнд адзін з самых буйных на экспазіцыі.

Беларускія прадукты ўжо карыстаюцца попытам у Азербайджане. Толькі ў Баку працуе некалькі магазінаў з нашай прадукцыяй. Што датычыцца вялікай тэхнікі, яе зборка ідзе на Гянджынскім аўтамабільным заводзе. Гэта сумесны праект.