Беларусь гатова пашыраць супрацоўніцтва з Расатамам, разглядаюцца і праекты прамысловай кааперацыі з Новасібірскай вобласцю

Беларусь гатова пашыраць супрацоўніцтва з дзяржкарпарацыяй "Расатам".

З уводам у эксплуатацыю Беларускай АЭС наша краіна атрымала істотныя перавагі і ўмацавала ўласную энергетычную бяспеку. Пра гэта гаварыў прэм'ер Раман Галоўчанка сёння на сустрэчы з кіраўніком дзяржкарпарацыі Аляксеем Ліхачовым. У Беларусі фактычна сфарміраваная новая галіна эканомікі пры непасрэдным удзеле Расатама. І яна стала магутным імпульсам для ўкаранення новых тэхналогій і інавацыйных рашэнняў.

Рэалізоўваць новыя сумесныя праекты Беларусь збіраецца з Новасібірскай вобласцю Расіі. Сёння ва ўрадзе прымалі губернатара Андрэя Траўнікава. Як адзначыў беларускі прэм'ер-міністр, двухбаковыя адносіны зараз знаходзяцца ў актыўнай фазе развіцця і падтрымліваюцца на ўзроўні кіраўніцтва рэгіёна - ад эканомікі да гуманітарнай сферы. І гэта дае свой плён: рэалізуюцца кантракты, а тавараабарот добра збалансаваны, пры гэтым ідзе напрацоўка праектаў на будучыню. Пра іх сёння гаварылі і на прадпрыемствах.

Сёння ў Мінску адкрыліся і Дні культуры Новасібірскай вобласці ў Беларусі. Да ўрачыстай цырымоніі прэм'ер і губернатар агледзелі выставачныя пляцоўкі гэтага праекта, на якіх дэманструецца ўся разнастайнасць і самабытнасць расійскай Сібіры.