Беларусь і Расія гатовы працаваць па збліжэнні пазіцый

Мінск і Масква гатовы працаваць па збліжэнні нашых пазіцый. Пытанні двухбаковага парадку сёння абмеркавалі спачатку ў Палацы Незалежнасці, пасля - з урадам. Прадстаўнічая расійская дэлегацыя на чале з прэм'ер-міністрам Расіі - сёння ў беларускай сталіцы. З Міхаілам Мішусціным правёў сустрэчу Аляксандр Лукашэнка. Актыўныя кантакты краіны падтрымліваюць у прамысловасці і энергетыцы, транспартнай сферы і будаўніцтве. Узмоцнена працуюць над інтэграцыйнымі пакетамі дакументаў.

Аб парадку сённяшніх перамоў - Вераніка Бута.

Аб тым, што ў Мінск прыбудзе расійская ўрадавая дэлегацыя, стала вядома напярэдадні. Пасля таго, як Пуцін і Лукашэнка пагаварылі па тэлефоне. Апроч лютаўскай асабістай сустрэчы прэзідэнтаў у Сочы, стэлефаноўваліся лідары ўжо чацвёрты раз за год.

Афіцыйны рэліз перамоў быў даволі сухім. Прагучала аб развіцці двухбаковых адносін, міжнародным парадку, які абмяркоўваецца.

Так што журналісты лагічна разлічвалі, што сустрэча з расійскім прэм'ерам дасць куды больш інфармацыйных падстаў.

Камандзіроўка ў Мінск для Мішусціна - даручэнне расійскага лідара. Наконт яе дамовіліся яшчэ ў лютым - раскрывае падрабязнасці Аляксандр Лукашэнка.

"Адна з найважнейшых праблем" - так, як відаць, Прэзідэнт называе працу над падатковай сістэмай. Бакі даўно абмяркоўваюць магчымыя адзіныя падыходы. Сёння, скажам, у Беларусі вышэйшы падатак на прыбытак, чым у суседзяў, больш нагрузкі нясе бізнес. А ў Расіі большы ПДВ. Галоўная ўмова (аб гэтым гаварылася неаднаразова) - каб механізм быў празрыстым і для Беларусі, і для Расіі. Дарэчы, Міхаіл Мішусцін у гэтых пытаннях далёка не апошні чалавек. Да прэм'ерскай пасады ён 10 гадоў узначальваў Федэральную падатковую службу Расіі.

Дэлегацыя прадстаўнічая. Бакі гатовы працаваць па збліжэнні нашых пазіцый і вырашэнні існуючых пытанняў. Пазней на перамовах у пашыраным складзе прэм'еры заявяць: пакет прапаноў па паглыбленні інтэграцыі ў высокай ступені гатоўнасці. Як прынята гаварыць, руку на пульсе трымаюць асабіста прэзідэнты.

Дзве з паловай гадзіны журналісты чакалі падрабязнасцяў дыялогу і меркавалі, аб чым ідзе размова за зачыненымі дзвярамі. Аб выніковасці сустрэчы можам толькі здагадвацца па настроі Прэзідэнта і прэм'ераў і жаданні прагуляцца па палацы.

Зрэшты, заслону таямніцы прыадкрылі пазней. Тэма інтэграцыі ў эканамічнай сферы - прыярытэтнае пытанне двухбаковага парадку дня. Летась наш тавараабарот склаў 29,5 млрд долараў. Не дабралі да ўзроўню 2020-га. Прычыны вядомыя: пандэмія і знешнепалітычная кан'юнктура. Эканамічная статыстыка пачатку года абнадзейвае: удалося нарасціць аб'ёмы на 15 %. Пры гэтым ёсць неабходнасць большай збалансаванасці двухбаковага гандлю.

Ёсць вынікі і ў педантычным пытанні лагістыкі нашых нафтапрадуктаў. Маршрут перабудавалі два месяцы таму. Марскія тэрміналы Расіі сталі альтэрнатывай прыбалтыйскім партам.

Больш як 220 тыс. т беларускіх грузаў адпраўлена праз марскую інфраструктуру Расіі.

Далей - больш. Абмяркоўвалі сёння такі маршрут для іншых тавараў, а таксама, як можна выкарыстоўваць сумесныя лагістычныя ланцужкі.

Павольнае адкрыццё беларуска-расійскай мяжы стрымлівае нашы эканомікі. Раман Галоўчанка перакананы: неабходна вяртацца да дакавіднага рэжыму перамяшчэнняў. На паступовае аднаўленне зносін паміж Беларуссю і Расіяй разлічвае і расійскі прэм'ер.

Пакуль не слабее ўплыў каранавіруса на наша жыццё, насцярожвае і з'яўленне новых штамаў. Беларусь і Расія сумесна працуюць над тым, каб засцерагчы людзей ад COVID.