Беларусь працягне ўмацаванне міру і бяспекі ў Еўропе

Ініцыятывы афіцыйнага Мінска ў сферы антытэрору, рэгіянальнай і сусветнай бяспекі цэняць у АБСЕ і гатовы падтрымліваць іх прасоўванне ў сусветных фарматах. Пра гэта ішла размова ў дыялогу Прэзідэнта Беларусі з Генеральным сакратаром Арганізацыі па бяспецы і супрацоўніцтве ў Еўропе Томасам Грэмінгерам. Сустрэча прайшла на палях антытэрарыстычнай канферэнцыі. Кіраўнік дзяржавы высока ацаніў міратворчую ролю АБСЕ і запэўніў, што Беларусь цалкам усведамляе сваю адказнасць як удзельнік, надзейны партнёр і пляцоўка для дыялогу па бяспецы.

Томас Грэмінгер, Генеральны сакратар АБСЕ: "Спадар Прэзідэнт, дазвольце падзякаваць за магчымасць наведаць Мінск. Гэта ўжо мой чацвёрты візіт за апошнія 13-14 месяцаў. Хачу выказаць глыбокую падзяку за актыўны ўдзел у справе садзейнічання міру і бяспецы, ваша актыўнае супрацоўніцтва з АБСЕ, правядзенне шэрагу сустрэч, у тым ліку кантактнай групы па ўрэгуляванні сітуацыі ва Украіне, садзейнічанне ініцыятывам, якія скіраваны на ўмацаванне міру і бяспекі".

Асобна генеральны сакратар АБСЕ адзначыў ролю Беларусі ў дасягненні мінскіх дамоўленасцяў і ўзгадненні комплексу мер па выкананні мінскіх пагадненняў. На думку Томаса Грэмінгера, трэба працягваць дыскусію па гэтым пытанні.