Дыпламатычным адносінам Беларусі і Ірана 30 гадоў

30 гадоў беларуска-іранскім дыпламатычным адносінам. 18 сакавіка 1993 года быў дадзены старт развіццю дружалюбных сувязяў паміж дзвюма краінамі. Прэзідэнт Беларусі Аляксандр Лукашэнка павіншаваў Прэзідэнта Ісламскай Рэспублікі Іран Эбрахіма Раісі з 30-годдзем дыпламатычных адносін. Кіраўнік дзяржавы адзначыў, што на працягу трох дзесяцігоддзяў народы дзвюх краін развіваюць узаемавыгаднае супрацоўніцтва на аснове прынцыпаў даверу і сяброўства.

У сваю чаргу Прэзідэнт Ірана ў віншавальным пасланні Прэзідэнту Беларусі адзначыў, што за 30 гадоў з моманту наладжвання дыпадносін былі створаны прававыя асновы супрацоўніцтва і забяспечана неабходная база для развіцця адносін у будучыні.

На гэтым тыдні Прэзідэнт Беларусі вярнуўся з Ірана, дзе знаходзіўся з афіцыйным візітам. З кіраўніком ісламскай дзяржавы Эбрахімам Раісі яны падпісалі дарожную карту супрацоўніцтва дзвюх краін, якая ўключае не толькі эканоміку і прамысловасць, але і навуку, медыцыну, а таксама адукацыю. У краін агульны погляд на сусветную геапалітыку. Мінск і Тэгеран разам гатовы супрацьстаяць санкцыйнаму націску на суверэнныя краіны.