Дыпламаты, якія прадстаўляюць Беларусь за мяжой, прыехалі ў Мінск на штогадовае навучанне

Дыпламаты, якія прадстаўляюць Беларусь за мяжой, звяраюць гадзіннікі і плануюць працу на найбліжэйшы час. Сёння кіраўнікі дыпмісій і консульскіх устаноў прыехалі ў Мінск на штогадовае навучанне. Паводле слоў міністра замежных спраў Уладзіміра Макея, праграма атрымалася максімальна насычанай і дакладнай.

Уладзімір Макей, Міністр замежных спраў Беларусі: 

"Цяперашняя вучоба спланаваная, зыходзячы са спецыфікі сітуацыі, зыходзячы са становішча, якое змяняецца: і эканамічнага, і палітычнага, і геапалітычнага, - і зыходзячы з тых задач, якія паставіў Кіраўнік дзяржавы перад дыпламатычным корпусам нашай краіны. Таму гэтым разам запланаваны шэраг сустрэч з вядучымі прадпрыемствамі-экспарцёрамі, і з улікам таго што ў наступным годзе ў нас будуць праходзіць ІІ Еўрапейскія гульні, мы нададзім увагу развіццю турыстычнай сферы ў нашай краіне, тэме задзейнічання нашага дыпламатычнага патэнцыялу ў рэалізацыі гэтай ідэі".

Уладзімір Макей адзначыў, што за Мінскам замацавалася рэнамэ пляцоўкі, якая садзейнічае развіццю інтэграцыйных працэсаў, урэгуляванню рэгіянальных канфліктаў. Паводле слоў кіраўніка МЗС, гэта адказны статус, які дазваляе многім партнёрам па-новаму зірнуць на Беларусь.

Валянцін Рыбакоў, пастаянны прадстаўнік Беларусі пры ААН: 

"У нас адносіны з ААН развіваюцца вельмі паспяхова. І на працягу многіх гадоў. Беларусь вельмі вядомая ў штаб-кватэры ААН сваімі ідэямі і ініцыятывамі, якія прапаноўваў Прэзідэнт Беларусі. У прыватнасці, Беларусь з'яўляецца галоўным каардынатарам праграмы дзеянняў, якая звязаная з барацьбой з гандлем людзьмі. І гэта ініцыятыва, якая была прапанаваная нашым Прэзідэнтам на адным з самітаў шмат гадоў таму. З тых часоў Беларусь стала адным з вядомых членаў ААН. Апошні час актыўна абмяркоўваецца рэалізацыя нейкіх міратворчых ініцыятыў, тое, што мы ўмоўна завем Хельсінкі-2".

Заняткі для дыпламатаў будуць праходзіць на працягу тыдня, але ў аўдыторыях Акадэміі кіравання яны правядуць усяго два дні. Мінскія семінары мяркуюць рашэнне практычных задач. Запланаваныя дзелавыя сустрэчы з кіраўніцтвам галіновых міністэрстваў і арганізацый па лініі Гандлёва-прамысловай палаты па прасоўванні прадукцыі машынабудаўнічага, нафтахімічнага, аграпрамысловага, дрэваапрацоўчага комплексаў, фармацэўтычнай прадукцыі, дзейнасці індустрыяльнага парка "Вялікі камень".