Іпатаў распавёў, у якіх сферах дамовіліся супрацоўнічаць Беларусь і Ліван

Беларуская дэлегацыя правяла серыю сустрэч у Ліване. Першыя перамовы, дарэчы, адбыліся літаральна за 100 м ад узлётна-пасадачнай паласы.

Дамовіліся актывізаваць супрацоўніцтва на блізкаўсходнім вектары - ад паставак прадуктаў харчавання, ветпрэпаратаў і сельгастэхнікі да пытанняў навучання кадраў і стварэння сумесных прадпрыемстваў.

У Беларусі штогод навучаецца больш за 600 студэнтаў, з якіх звыш 50 - медыкі. Многія вяртаюцца дахаты, каб ратаваць жыцці. Гучалі таксама прапановы павялічыць у беларускіх ВНУ набор ліванскіх урачоў і іншых спецыялістаў. У дарунак ліванскаму народу былі перададзены машыны хуткай дапамогі і прадукцыя беларускай вытворчасці - гэта рашэнне Прэзідэнта Беларусі Аляксандра Лукашэнкі.

Вадзім Іпатаў, намеснік старшыні Палаты прадстаўнікоў Нацыянальнага сходу Беларусі:

"У 2004-2005 гг. лідары Ліванскай Рэспублікі і Рэспублікі Беларусь залажылі трывалы падмурак узаемадзеяння. У сілу аб'ектыўных прычын гэта ўзаемадзеянне некалькі замарудзілася. І зараз, калі Аляксандрам Лукашэнкам было прынята рашэнне аб накіраванні ўрадавай дэлегацыі ў Ліванскую Рэспубліку, то гэты момант трэба выкарыстаць для паглыблення супрацоўніцтва па розных сферах, не толькі ў эканоміцы. Звярну ўвагу, што ўрадавая дэлегацыя складаецца з дзвюх частак - выканаўчай і заканадаўчай улады".

Перспектывы супрацоўніцтва абмеркавалі з прэм'ер-міністрам Лівана. Дарожную карту трэба будзе напоўніць канкрэтнымі праектамі ва ўсіх галінах. Размова ідзе, напрыклад, аб пастаўках пажарных машын. У сельскай гаспадарцы патрэбныя тэхніка і тэхналогіі. Ключавое ў супрацоўніцтве - узаемныя інтарэсы. Для Беларусі важныя перспектывы рынку Блізкага Усходу, а Лівану цікавы выхад на прасторы ЕАЭС.