Аб кааперацыі беларуска-казахстанскіх прадпрыемстваў сёння гаварылі прэм'еры дзвюх краін

Раман Галоўчанка з рабочым візітам зараз знаходзіцца ў Казахстане. Па аб'ёме экспарту гэтая краіна ў дзясятцы асноўных нашых гандлёвых партнёраў, ёсць і шмат сумесных вытворчасцяў, якія працуюць з прыбыткам і пастаянна пашыраюць і лінейкі тавараў, і зборачныя плошчы. За мінулы год краіны нагандлявалі амаль на 850 млн долараў.

Пра новыя нішы і магчымасці супрацоўніцтва Беларусі і Казахстана - карэспандэнт Святлана Лук’янюк.

Сёння ўзровень двухбаковых адносін вызначае не просты гандаль і ўзаемны тавараабарот, усё будуецца не толькі на куплі-продажы, хаця яны таксама неабходныя (бо ёсць такія тавары, якія прасцей купіць у партнёра, таму што самі пакуль не вырабляем: сыравіна, камплектуючыя, тая ці іншая прадукцыя), але сёння важная і кааперацыя. Тым больш калі партнёрам ёсць што прапанаваць, падзяліцца напрацоўкамі, абмеркаваць стратэгію на рынку. Для Беларусі і Казахстана, безумоўна, гэта машынабудаванне, сельская гаспадарка і ўсё, што датычыцца будаўніцтва. Кожнаму ёсць што сказаць і паказаць.

Аб сумеснай рабоце гаварылі ў Казахстане сёння прэм'еры. Ёсць праекты, якія працуюць гадамі, іншыя пакуль у планах. Абмеркаваць усё на месцы вырашылі якраз на вытворчых пляцоўках Кастанайскага рэгіёна. Тэрыторыя гэта па большай частцы прамысловая. І яна адкрыта для прапаноў. Славіцца Кастанай у тым ліку і сваімі аўтапрадпрыемствамі. Напрыклад, з гэтых канвеераў сыходзяць легкавушкі дзевяці брэндаў. На іх ездзяць і беларусы, а таксама расіяне, азербайджанцы. Словам, пакупнікі ёсць. Пад іх запыты тут збіраюць і аўто на батарэях. Сотня электракараў ужо на дарогах. Пра машыны на зарадцы сёння гаварылі з беларускім прэм'ерам. Экатрэнды - гэта і шлях Беларусі. Нашы электробусы ўжо ацанілі пасажыры ў многіх краінах, на сваіх дарогах расце і колькасць падзарадак. Ацаніць канкурэнтаў таксама справа патрэбная.

Наш МТЗ у гэты рэгіён прыйшоў сур'ёзна і надоўга. Ужо ёсць тры зборачныя вытворчасці і гандлёвы дом. Але гэта толькі пакуль. Раману Галоўчанку сёння паказалі перспектыву на макеце з новымі цэхамі і аб'ёмамі будучыні, а таксама ўсе пляцоўкі пад іх. Размова ідзе аб глыбокай лакалізацыі вытворчасці трактароў. І гэта інвестыцыі ў заўтра. Іх каля 7 млн долараў.

Цэх па выпуску ўніверсальных трактарных кабін абяцаюць запусціць да канца года. А першую чакаем у пачатку наступнага. Гэты бізнес-план, упэўненыя, тут акупіцца з лішкам. Палям Казахстана патрэбная новая тэхніка. Амаль палова той, што працуе, чакае замены. Вялікія пляцоўкі пад зборку вырашаць гэтую задачу. Зараз тут трактары збіраюць у адну змену, але гатовы выходзіць і ў тры. Бо попыт, запэўнівае прэм'ера кіраўніцтва завода, на нашы "Беларусы" будзе расці. Яны сябе выдатна паказваюць у справе.

Але не толькі трактары патрэбныя вялізным сельгасугоддзям Казахстана, а яшчэ і камбайны, сеялкі, корманарыхтоўчыя машыны. Лінейка прапаноў расце з года ў год. Наконт гэтага гаварылі на "АграмашХолдынгу". Ён - эксклюзіўны дыстрыб’ютар тут беларускага Гомсельмаша. І не толькі. Кааперацыйныя сувязі наладжаны са многімі нашымі прадпрыемствамі.

Бабруйскаграмаш спадзяецца папоўніць і скарбонку сумесных кантрактаў. Якраз у гэтыя дні рыхтуецца новы. Шмат перамоў яшчэ наперадзе. Сярод важных партнёраў - Сакалоўска-Сарбайскае горна-ўзбагачальнае аб'яднанне, лідар па пастаўках жалезнай руды і алюмінію ў ЕАЭС, ды і тэма АПК і будаўніцтва фермаў па беларускіх тэхналогіях цікавыя нашых партнёрам. Мы прыехалі з пакетам прапаноў, каб змацаваць іх двухбаковымі подпісамі.