Лукашэнка: Наша галоўная задача - не дапусціць новай сусветнай вайны

Кіраўнік беларускай дзяржавы сёння прыняў даверчыя граматы паслоў 11-ці дзяржаў.

Геаграфія супрацоўніцтва - ад Еўропы да Афрыкі і Лацінскай Амерыкі. Гэтая цырымонія дае старт афіцыйнай працы дыпламатаў у нашай краіне. Як падкрэсліў Аляксандр Лукашэнка, увесь свет знаходзіцца зараз на складаным шляху фарміравання новай структуры міжнародных адносін - шматпалярнасці. Беларусь, якая перажыла нямала ўзрушэнняў і неаднаразова станавілася тэатрам ваенных дзеянняў, засвоіла ўрокі гісторыі. І наша асноўная задача - не дапусціць новых узрушэнняў.

Кіраўнік дзяржавы звярнуўся да кожнага дыпламата - гэта свайго роду экскурс, як далей будуць развівацца адносіны паміж краінамі. Казахстан - блізкая нам дзяржава, стратэгічны партнёр і саюзнік. Сяброўскія адносіны на ўзроўні лідараў краін дазваляюць абмяркоўваць любыя пытанні.

Венгрыя - даўні і надзейны сябар нашай краіны, адносіны з якім, прайшоўшы выпрабаванне часам, развіваюцца на прагматычнай і ўзаемапаважлівай аснове. Звяртаючыся да прадстаўнічай групы паслоў з краін Афрыкі, Прэзідэнт адзначыў: "Мы верым у кантынент і ўскладаем на яго вялікія надзеі". Кіраўнік дзяржавы прыняў даверчыя граматы ў паслоў Егіпта, Зімбабвэ, Экватарыяльнай Гвінеі, Анголы і Уганды.

Мінск зацікаўлены ў далейшым пашырэнні кола партнёраў і на Блізкім Усходзе. Іарданія выступае як краіна-міратворац у рэгіёне. Такія падыходы блізкія і Беларусі. Важным партнёрам у Лацінскай Амерыцы з'яўляецца Калумбія, афіцыйнаму Мінску імпануе яе ўзважаная і незалежная палітыка ў міжнародных справах. Бачныя новыя магчымасці для актывізацыі дыялогу на ўсіх узроўнях, пашырэння гандлю і ўзаемадзеяння ў іншых сферах.