Міжурадавы савет ЕАЭС расставіў прыярытэты еўразійскай інтэграцыі

Міжурадавы савет ЕАЭС, які на працягу двух дзён праходзіў у Кыргызстане, расставіў прыярытэты еўразійскай інтэграцыі. Саміт сабраў прэм'ераў "пяцёркі". Сёння пасяджэнне прайшло ў шырокім фармаце. Агульныя рынкі, лічбавыя транспартныя калідоры і гандаль без межаў зробяць саюз больш моцным і ўстойлівым і да вірусных катаклізмаў, і да санкцыённага прэсінгу. Таму нароўні з прававымі дакументамі, заканадаўчай еўразійскай базай асаблівая ўвага надаецца сумесным праектам, стварэнню рэестра прамысловай прадукцыі і допуску да дзяржзакупак. Святлана Лук’янюк пра вынікі перамоў.

Зняць старыя і новыя бар'еры. Сёння еўразійская "пяцёрка" пералічыла абмежаванні, якія плануе ліквідаваць за 2 гады, каб супярэчнасці ўнутры саюза не тармазілі ні кааперацыю, ні гандаль. За папярэднія 5 гадоў удалося развітацца з пяццю дзясяткамі такіх перашкод. І гэта, безумоўна, рух наперад. Але па меры пашырэння сфер узаемадзеяння з'яўляюцца новыя. Па іх зараз і працуюць.

Мерапрыемства праходзіла ў Кыргызстане. Да перамоў у шырокім складзе адбылася сустрэча ўсіх прэм'ераў з прэзідэнтам, дзе яшчэ раз падкрэслілі: праца разам дала магчымасць выстаяць эканомікам у складаны пандэмійны мінулы год. Сёння час рухацца наперад. Вектары якраз узгаднялі шырокім саставам.

Сёння абмеркавалі агульныя сыравінныя рынкі газу, нафты і нафтапрадуктаў. Беларускі бок заклікае калег своечасова завяршыць работу над праектамі пагадненняў.

Гаварылі пра агульны рынак арганічнай сельгаспрадукцыі. Гэта сусветны трэнд, і важна не ўпусціць шанц і заняць сваю нішу. У нас тут цікавасць вялікая, бо сёння Беларусь - буйны экспарцёр харчавання. "Пяцёрка" дамовілася распрацаваць міжнародны дагавор і прапісаць свабоднае перамяшчэнне экапрадукцыі на еўразійскай тэрыторыі. У цэлым жа ЕАЭС за першае паўгоддзе ўнутры саюза нагандляваў на траціну больш, чым летась. Выраслі на чвэрць і продажы на замежныя рынкі. Гэта той самы эфект ад кааперацыі.

Але сёння, адзначае беларускі прэм'ер, прадпрыемствам даводзіцца змагацца не толькі з канкурэнтамі за свайго пакупніка, але і пераадольваць санкцыённы прэсінг.

Каб гандаль ішоў больш дынамічна, патрэбна выразная лагістыка. "Пяцёрка" падпісала дарожную карту па транспартнай палітыцы на 3 гады, дзе авія-, чыгуначныя і аўтаперавозкі. А зялёныя калідоры і развіццё транспартна-лагістычных хабаў - мэта мемарандума, які сёння подпісамі змацавалі чыгуначнікі. Зручныя і хуткія маршруты плюс лічбавыя тэхналогіі зробяць дастаўку тавараў хуткай па ўсіх напрамках.

Задача нумар адзін - далейшае ўмацаванне супрацоўніцтва ўнутры саюза. Гэта робіць мацнейшай эканоміку кожнай краіны і ўсяго ЕАЭС у цэлым. Наступны раз пазіцыі на прэм'ерскім узроўні Беларусь, Расія, Казахстан, Арменія і Кыргызстан звераць напрыканцы кастрычніка ў Арменіі. А больш падрабязна аб рашэннях міжурадавага савета, двухбаковых перамовах з Расіяй і рэгіянальнай бяспецы глядзіце ў "Галоўным эфіры" ў нядзелю, 29 жніўня, на "Беларусь 1".