Падрыхтоўку да саміту лідараў “пяцёркі” абмеркавалі ў Палацы Незалежнасці

Амаль тры дзясяткі пытанняў развіцця еўразійскай інтэграцыі і двухбаковыя адносіны паміж краінамі-ўдзельніцамі ЕАЭС. Падрыхтоўку да саміту лідараў “пяцёркі” абмеркавалі ў Палацы Незалежнасці ў Мінску.

Прэзідэнт сустрэўся са старшынёй Калегіі Еўразійскай эканамічнай камісіі Міхаілам Мясніковічам. Сённяшні дыялог - добрая магчымасць зверыць гадзіннікі, абмеркаваць аргпытанні будучай дыскусіі. Пасяджэнне Вышэйшага Еўразійскага эканамічнага савета прызначана на 11 снежня. Важнымі мерапрыемствамі інтэграцыйнай тэматыкі мы завершым год старшынства ў арганізацыі. За гэты час, нягледзячы на ўсе цяжкасці 2020, зроблена нямала. Галоўнае, удалося ўзгадніць вялікі праграмны дакумент на будучую пяцігодку. Саміт лідараў ЕАЭС пройдзе ў анлайн-фармаце. Хоць Аляксандр Лукашэнка заўсёды быў і застаецца прыхільнікам сустрэч сам-насам. Такія дыялогі больш канструктыўныя. А бакам сапраўды ёсць што абмеркаваць. Гэты год стаў сур'ёзнай праверкай на трываласць для саюза. На фоне пандэміі ВУП краін ЕАЭС знізіўся больш чым на 3 %.

Адным з ключавых пытанняў парадку дня 11 снежня, як чакаецца, стане газавае на прасторы саюза. Тут ёсць некалькі шляхоў вырашэння. Аб варыянтах журналістам распавёў Міхаіл Мясніковіч. У адпаведнасці з праграмай фарміравання агульнага рынку газу, у 2021 годзе павінен быць распрацаваны праект міжнароднай дамовы, дзе прапішуць нюансы фарміравання цаны на паліва і тарыфаў на прапампоўку.

ЕАЭС пераходзіць да новай фазы інтэграцыі і гатовы прапанаваць праекты на 200 мільярдаў долараў. Размова аб тым, каб ствараць сумесныя трансеўразійскія эканамічныя кампаніі. Краіны працуюць па стварэнні карты развіцця аграіндустрыі, сістэмы маніторынгу харчовай бяспекі, праекта ў касмічнай сферы. У стратэгічных кірунках развіцця еўразійскай інтэграцыі плануецца таксама адлюстраваць развіццё заканадаўчай базы ЕАЭС. Так, у найбліжэйшыя 3-5 гадоў неабходна прыняць 13 міжнародных дамоў, каля 60 нарматыўных прававых актаў і амаль 25 змяненняў і паправак.