Прэзідэнт Беларусі і выканаўчы сакратар СНД гаварылі аб планах і перспектывах Садружнасці

У СНД трэба паставіць больш сур'ёзныя задачы і ажыццявіць прарыў. Аб планах і перспектывах Садружнасці гаварылі сёння Прэзідэнт Беларусі і старшыня Выканаўчага камітэта - выканаўчы сакратар СНД.

Сустрэча праходзіць напярэдадні пасяджэння Савета кіраўнікоў урадаў. Нагадаем, наша краіна старшынствуе сёлета. Першыя ацэнкі за праробленую працу высокія. Вынікі ж вызначана падвесці ў сярэдзіне кастрычніка на саміце ў Мінску. Старшынства Беларусі ў СНД праходзіць па-сапраўднаму ў няпростых умовах. Гэта і пандэмія, якая працягваецца, і санкцыйны ціск з боку Захаду, і спробы палітычна дэстабілізаваць становішча ў рэгіёне. У нашых прыярытэтах, перакананы Аляксандр Лукашэнка, умацаванне інтэграцыйных механізмаў на постсавецкай прасторы.

Зараз СНД у асноўным з'яўляецца свайго роду дыскусійнай пляцоўкай, дзе абмяркоўваюцца сур'ёзныя і важныя пытанні. "Але трэба нейкай канкрэтыкай, як мне здаецца, напоўніць нашу гэтую арганізацыю. Фактычна парасонавую арганізацыю над ЕАЭС, АДКБ і гэтак далей. Адкрыта пагаварыць з кіраўнікамі дзяржаў, ці гатовыя яны рухацца ў кірунку іншых, больш цесных аб'яднанняў. Дапусцім, у эканоміцы - ЕАЭС, у ваенна-палітычнай сферы - АДКБ. Нешта ў гэтым плане. Калі б вы прапрацавалі гэтае пытанне і маглі ўнесці прапанову, я быў бы вашым добрым лабістам, нашага Выканкама, каб прапанаваць кіраўнікам дзяржаў пагаварыць у рамках гэтага саміту з мэтай надання большай дынамікі і большага аўтарытэту і вагі нашай арганізацыі", - сказаў Прэзідэнт Беларусі.

Заўтра ў Мінску пройдзе пасяджэнне Савета кіраўнікоў урадаў СНД. Кіраўнікі дэлегацый сустрэнуцца перш у вузкім, затым і ў пашыраным фарматах. На парадку папярэдне 11 пытанняў. Акцэнт - на развіццё агульнай эканамічнай прасторы, лібералізацыю гандлю, уніфікацыю заканадаўства і пытанні процідзеяння распаўсюджванню інфекцыйных хвароб.