Прэзідэнт - кіраўніцтву Мінска: трэба апярэджваць запыты насельніцтва або аператыўна рэагаваць

Комплекснае развіццё Мінска - у цэнтры ўвагі Прэзідэнта. Вялікая нарада сёння прайшла ў Палацы Незалежнасці. Аднак у святле ўчарашняга трагічнага здарэння ў Баранавічах сустрэчу пачалі з хвіліны маўчання па загінуўшых лётчыках.

З самай раніцы, яшчэ да сустрэчы з уладамі горада, аб ходзе расследавання крушэння самалёта Прэзідэнту далажыў дзяржсакратар Савета бяспекі. Важна максімальна інфармаваць людзей пра здарэнне і не дапусціць абразлівых каментарыяў у адрас загінуўшых герояў, якія цаной свайго жыцця выратавалі дзясяткі людзей, а таксама дапамагчы іх сем'ям. Такую задачу ставіць Аляксандр Лукашэнка.

Нарада ў Палацы Незалежнасці ў пашыраным фармаце: за адным сталом мэр, памочнік Прэзідэнта і абодва ўпаўнаважаных па Мінску, а таксама кіраўнікі адміністрацый горада. На парадку дня - сацыяльна-эканамічнае развіццё, грамадска-палітычнае становішча, рэалізацыя найважнейшых інвестпраектаў і перспектывы развіцця сталіцы. Раней, нагадаем, перад кіраўніцтвам горада стаяла задача зрабіць Мінск узорным, гэта значыць камфортным і сучасным. У сталіцы ўсе працэсы працякаюць значна хутчэй, чым у рэгіёнах. Таму вельмі важна, завастрае ўвагу ўдзельнікаў нарады Прэзідэнт, апярэджваць запыты насельніцтва і аператыўна рэагаваць.

Асобна спыніліся на тэмпах росту насельніцтва ў Мінску - ужо перавышана планка ў 2 мільёны жыхароў, што не вельмі станоўча ўплывае і на экалогію, і на камфорт жыцця. Разам з тым колькасць занятых у эканоміцы зніжаецца, і гэта не тая тэндэнцыя, адзначыў кіраўнік дзяржавы, якую жадалася б замацоўваць.

Даручыў Аляксандр Лукашэнка таксама разабрацца з шэрагам інвестпраектаў-даўгабудаў. Сярод найбольш праблемных "Газпром трансгаз Беларусь" у Мінску, а таксама кампанія "Белпарс" (аб'ект ля Нацыянальнай бібліятэкі). Да 1 жніўня неабходна ўнесці пэўныя прапановы па кожным такім аб'екце.

Прапанавалі на нарадзе таксама ўстанавіць помнік Мітрапаліту Філарэту, Прэзідэнт ідэю падтрымаў. У найкароткія тэрміны манумент з'явіцца ля Кафедральнага сабора.