Прэзідэнт сустрэўся з паслом Расіі

Сёння кіраўнік дзяржавы сустрэўся з паслом Расіі ў Беларусі Дзмітрыем Мезенцавым. Як заявіў прэзідэнт, краінам важна захаваць дынаміку ўзаемных кантактаў ва ўсіх сферах. Кіраўнік расійскай дыпмісіі, дарэчы, прадстаўляе інтарэсы афіцыйнай Масквы ў Мінску ўжо амаль паўтара года.

Апошнім часам краіны значна прасунуліся ў вырашэнні набалелых праблем двухбаковага парадку дня, адзначыў Аляксандр Лукашэнка. Пандэмія прыпыніла абмеркаванне інтэграцыйных перспектыў, але сёння бакі гатовы вярнуцца да дыялогу. Галоўнае - выканаць раўнапраўную аснову партнёрства. Апошнім часам кантакты Мінска і Масквы прыкметна актывізаваліся і па лініі знешнепалітычных ведамстваў, і на ўзроўні ўрадаў. Чакаецца, што ў найбліжэйшы час у Маскве адбудзецца і чарговая асабістая сустрэча прэзідэнтаў. Ну а пасля падставай абмеркаваць эканамічнае ўзаемадзеянне стане Форум рэгіёнаў дзвюх краін.

І сёння ж расійскі дыпламат павіншаваў Аляксандра Лукашэнку з мінулым днём нараджэння. А падарункам стаў першы экзэмпляр факсіміле 1866 года з тапаграфічнымі картамі Віцебскай, Гродзенскай, Мінскай і Магілёўскай губерняў. Гэта яшчэ адно пацвярджэнне справядлівасці межаў Беларусі і адказ тым, хто глядзіць па-іншаму, заявіў пасол. А пасля ў зносінах з журналістамі Дзмітрый Мезенцаў падагульніў сустрэчу, адзначыўшы поспехі мінулых перамоў у Мінску і выказаўшы надзею, што будучыя будуць не менш дзейснымі.

Сёння краіны рыхтуюцца да правядзення сумеснага Форуму рэгіёнаў. На гэты раз беларуская сталіца прыме эстафету ад Санкт-Пецярбурга, дзе прадстаўнікі бізнесу сустракаліся летась. Тады сумы кантрактаў склалі каля 500 мільёнаў долараў. Чакаецца, што цяперашні форум стане не менш прадукцыйным.