З Новым годам Аляксандр Лукашэнка павіншаваў замежных лідараў

31 снежня словы "З надыходзячым!" гучаць без прыпынку. Навагоднімі віншаваннямі прынята абменьвацца і ў палітыкаў на вышэйшым узроўні. З Новым годам Аляксандр Лукашэнка павіншаваў замежных лідараў. Кіраўнік дзяржавы накіраваў віншаванні кіраўніцтву Расіі і асабіста Уладзіміру Пуціну, Старшыні Кітайскай Народнай Рэспублікі, а таксама лідарам краін СНД. Віншавальныя паведамленні ад імя Прэзідэнта Беларусі адрасаваныя кіраўнікам іншых краін у розных рэгіёнах свету і кіраўнікам міжнародных арганізацый. Пасланні з віншаваннямі накіраваныя таксама рэлігійным і грамадскім дзеячам.

Шматлікія навагоднія віншаванні ад замежных лідараў, кіраўніцтва міжнародных арганізацый, вядомых дзеячаў таксама паступаюць і на адрас Прэзідэнта Беларусі. Аляксандра Лукашэнку ўжо павіншавалі лідары Расіі, Кітая, Казахстана, Азербайджана, Арменіі, Таджыкістана, Туркменістана, Узбекістана, Кыргызстана, Грузіі, Егіпта, Сербіі, ААЭ, Індыі, Сірыі, Бахрэйна, Кувейта, Іарданіі, В'етнама, Палесціны, Руанды, Філіпін і Манголіі. Акрамя таго, паступілі віншаванні ад кіраўніцтва розных міжнародных арганізацый, уключаючы ЕАЭС, АДКБ, СНД і Міжнародны валютны фонд. І навагоднія віншаванні на адрас Прэзідэнта Беларусі працягваюць паступаць.