Сёння стартуе VII Форум рэгіёнаў Беларусі і Расіі

Беларусь і Расія нарошчваюць эканамічны патэнцыял. Сёння стартуе найбуйнейшая падзея ў дзелавым календары дзвюх краін - адкрываецца Форум рэгіёнаў. Сёлета анлайн- і афлайн-пляцоўкамі для сустрэч і перамоў стане Мінск і Мінская вобласць.

Падрабязнасці ў Вольгі Анішчанкі. Бадай, упершыню ў сваёй гісторыі Форум рэгіёнаў сёлета пераходзіць у анлайн-фармат. З аднаго боку, зручныя тэхналогіі, ад якіх не варта адмаўляцца, гавораць арганізатары. З другога, вядома, COVID-сітуацыя. І тут наўрад ці патрэбныя апраўданні. Але тым не менш многія ўпэўнены: гэта не паўплывае на эфектыўнасць адной з найважнейшых эканамічных падзей у двухбаковым парадку дня.

Максімальная прысутнасць расійскіх рэгіёнаў - так напярэдадні абазначылі маштаб удзелу гасцей. І зразумела, усе беларускія вобласці. Форум рэгіёнаў ужо зарэкамендаваў сябе пляцоўкай для хуткіх перамоў: можна дамовіцца напрамую, абыходзячы сталічнае пасрэдніцтва, што ўплывае на тэмпы ўзаемнага гандлю. Папярэдне падлічана і колькасць пагадненняў (іх будзе каля 70). Але зусім не ў гэтым сутнасць праекта. Форум развівае рэгіянальныя сувязі, умацоўвае агульную эканоміку. Без іх Мінск і Масква наўрад ці б мелі такія цесныя, саюзніцкія адносіны.

Прамысловасць, будаўніцтва, сельская гаспадарка і не толькі - у рэгіёнаў цікавасць адзін да аднаго не замыкаецца на традыцыйных сферах супрацоўніцтва. Партнёры ў пошуках новых пунктаў росту агульнай эканомікі. Датэрмінова вядома пра некалькі буйных пагадненняў. Адзін з іх - пры ўдзеле Магілёўхімвалакна і расійскай профільнай кампаніі "Авангард". Каля 30 млн долараў сума здзелкі. Але! Будуць і іншыя. Зрэшты, форум спрыяе развіццю не толькі дзелавых сувязяў паміж рэгіёнамі. Краіны моцна звязвае агульная памяць. Пад гэтым знакам - гістарычнай спадчыны Вялікай Перамогі - пройдуць усе сустрэчы многіх палітыкаў і экспертаў.