Сёння завяршыла сваю работу восеньская сесія Савета Рэспублікі і Палаты прадстаўнікоў

Сенатары адобрылі праект бюджэту на наступны год, а таксама пад заслону разам з дэпутатамі задавалі пытанні ўраду. Сёння адказ трымаў віцэ-прэм'ер Ігар Ляшэнка. Сёлета адзначана добрая дынаміка росту эканомікі. Дадатна спрацавалі прамысловасць і будаўніцтва, транспарт і гандаль. Больш за 60 % беларускіх тавараў прадалі на экспарт. Пры гэтым з'яўляюцца новыя рынкі. Так, продажы ў краіны Еўрасаюза павялічыліся ўдвая. Гэты трэнд будзе вызначальным і ў наступным годзе, дзе ад прамысловасці чакаюць прыросту не менш за 4,5 %. За кошт чаго? А таксама як паўплывае на беларускую эканоміку падатковы манеўр Расіі і што будзе з цэнамі на бензін? Адказы выслухала наш карэспандэнт Святлана Лук’янюк.

Сярод рэзерваў росту эканомікі ў наступным годзе называюць увод новых магутнасцяў мадэрнізаваных вытворчасцяў. У прыватнасці, прадпрыемстваў лёгкай прамысловасці. На "Камволі" плануюць выпускаць да 4 мільёнаў пагонных метраў тканіны, а на Аршанскім ільнокамбінаце да 18, каб загрузіць беларускіх швейнікаў уласнай тканінай і экспартаваць. Новыя рынкі збыту - задача нумар адзін для ўсіх прадпрыемстваў.

У машынабудаванні асноўны праект - "БелДжы". У 2019-м ад яго чакаюць 25 тысяч аўто. Новая лінейка на газадызельным рухавіку ад Мінскага трактарнага. Новы комплекс "Гродна Азот" у паўтара раза павялічыць вытворчасць угнаенняў. А праца на поўную Светлагорскага цэлюлозна-кардоннага камбіната - гэта 400 тысяч тон прадукту за год. Усё разам - рост прамысловай вытворчасці на 4,5 %. Але за ўсімі пазітыўнымі лічбамі ўвага і на страты ад падатковага манеўру Расіі, і як гэта паўплывае на беларускую нафтаперапрацоўку.

Ужо падлічылі. І як сёння сказалі на пасяджэнні, страты для нашых нафтаперапрацоўчых заводаў ад падатковага манеўру ў Расіі - каля 240 мільёнаў долараў. Плюс страты бюджэту ад недаатрыманых падаткаў больш як 140 мільёнаў долараў. Усё гэта можа адбіцца на цане на паліва. Толькі сёлета кошт бензіну мяняўся 27 разоў.

Сярод буйных інвестпраектаў віцэ-прэм'ер назваў Беларускую АЭС. У наступным годзе плануюць запусціць першы энергаблок. А летам 2020 года другі. Пытанне наконт паніжэння ставак па расійскім крэдыце пад будаўніцтва станцыі і павелічэнне тэрмінаў вяртання пакуль застаецца адкрытым.

Як спрацуе эканоміка на старце года і ў першым квартале, у гэтай зале будуць гаварыць ужо вясной. Сёння дэпутаты і сенатары закрылі восеньскую сесію. Наступны раз яны збяруцца 2 красавіка. Тады адкрыецца вясновая. Да яе асноўная праца ў пастаянных камісіях, дзе рыхтуюцца новыя праекты законаў і папраўкі ў дзеючыя. Асноўны ж дакумент на год будучы - бюджэт-2019 - сёння адобрыў Савет Рэспублікі. Дзяржказна сфарміраваная з прафіцытам, значыць, траціць будзем рацыянальна, а зарабляць плануем больш. Аптымізм усяляе і прагноз па росце ВУП і ўзроўні інфляцыі.