У Душанбэ праходзіць саміт ШАС - удзел у пасяджэнні прымае Аляксандр Лукашэнка

У Душанбэ сёння саміт Шанхайскай арганізацыі супрацоўніцтва. Удзел у пасяджэнні савета кіраўнікоў дзяржаў аб'яднання прымае наш Прэзідэнт.

Цяперашні саміт - юбілейны: 20 гадоў з дня заснавання арганізацыі, якая пачалася з "пяцёркі". Сёння ў складзе 8 удзельнікаў: Расія, Кітай, Казахстан, Кыргызстан, Таджыкістан, Узбекістан, а таксама Індыя і Пакістан, якія далучыліся ў 2017 годзе. Беларусь атрымала статус назіральніка ў Шанхайскай арганізацыі супрацоўніцтва ў 2015-м. Апроч нас, сярод назіральнікаў яшчэ Афганістан, Іран і Манголія. На першым плане - бяспека і падтрыманне міру ў рэгіёне. Усё большае значэнне краіны надаюць развіццю эканамічнага супрацоўніцтва. Тэмпы росту эканомік краін Шанхайскай арганізацыі супрацоўніцтва, іх ваенныя патэнцыялы - а сярод членаў 4 ядзерныя дзяржавы - без лішніх слоў гавораць аб перспектыўнасці аб'яднання.

Агульная стабільнасць, становішча ў Афганістане, пераадоленне наступстваў пандэміі - вось, бадай, галоўныя тэмы, якія ў сваіх выступленнях закранае кожны з лідараў. Канстатуюць дэфіцыт даверу, турбуюць пытанні бяспекі і магчымая радыкалізацыя ў рэгіёне з-за афганскай сітуацыі. Усе зацікаўленыя ў яе ўрэгуляванні. У гэтай сувязі гавораць і аб важнасці антытэрору, і аб кантролі міграцыйных струменяў. Што датычыцца эканамічнага развіцця, то тут акцэнт на лічбавізацыю. Будуць развіваць і супрацьэпідэмічнае ўзаемадзеянне.

Супрацоўніцтва на гэтай пляцоўцы адкрывае для Беларусі вялікія перспектывы не толькі ў палітыцы, але і ў гандлі. Выступаючы на форуме, наш Прэзідэнт падкрэсліў, што настае час гістарычнага тэсту для Шанхайскай арганізацыі супрацоўніцтва.

Усяго да разгляду на пасяджэнні падрыхтавана больш як 40 дакументаў. Па выніках чакаецца запуск працэдуры прыёму Ірана ў якасці паўнапраўнай дзяржавы - члена Шанхайскай арганізацыі супрацоўніцтва і падаванні статусу партнёра па дыялогу Егіпту, Катару і Саўдаўскай Аравіі.