У Казані адбылася сустрэча прэм'ер-міністраў Беларусі і Расіі

Еўразійская інтэграцыя і двухбаковыя адносіны. У Казані гэтымі днямі праходзіць дыялог на ўзроўні прэм'ераў Беларусі, Расіі, Казахстана, Арменіі і Кыргызстана. Татарстан прымае Міжурадавы савет Еўразійскага эканамічнага саюза.

Форум стартуе заўтра. У цэнтры ўвагі - эканоміка аб'яднання, гандаль на роўных, забеспячэнне ўнутраных рынкаў усёй неабходнай прадукцыяй у гэты пандэмійны час, а таксама прамысловая кааперацыя на 5 гадоў наперад. Некаторыя падыходы ў двухбаковым супрацоўніцтве абмеркавалі ўжо сёння падчас сустрэч беларускай урадавай дэлегацыі.

Падрабязнасці перамоў - у карэспандэнта Святланы Лук’янюк.

Міжурадавы савет Еўразійскага эканамічнага саюза ў Татарстане

Казань прымае гэтымі днямі кіраўнікоў урадаў краін "пяцёркі" ЕАЭС. А напярэдадні вялікай гутаркі ў вузкім і пашыраным фармаце Міжурадавага савета дыялог аб практычных кроках еўразійскай інтэграцыі. Вядома, гасцям паказваюць лепшае ў розных сферах - дасягненні сучаснай прамысловасці - у міжнародным выставачным цэнтры "Казань Экспо". Пункты судакранання, якія могуць стаць сумесным прадуктам, а яшчэ экспарт-імпарт - усё гэта абмяркоўвалі падчас агляду экспазіцыі.

Прамысловая выстава ў міжнародным выставачным цэнтры "Казань Экспо"

Лічбавыя тэхналогіі, медыцынскія распрацоўкі, а таксама ўзоры нашага канкурэнта - КамАЗ: пасажырскія аўтобусы і спецтранспарт. Татарстан славіцца машынабудаваннем, а кааперацыя з беларусамі дае добры вынік. У гэтых камунальных аўто нашы маторы. Надзейнасць праверана амаль двума дзесяцігоддзямі.

Гэта асаблівая эканамічная зона "Алабуга". Ёй больш за 15 гадоў, і за гэты час яна стала самай паспяховай у Расіі тэрыторыяй, прывабнай для інвестыцый і дзе прэферэнцыі для бізнесу даюць вынік. Сёння тут амаль шэсць дзясяткаў кампаній, і ўсе яны лідары ў сваёй галіне. Сярод іх і беларускае навукова-вытворчае прадпрыемства "СМІТ" - завод па вытворчасці ізаляваных пенаполіўрэтанавых труб. Яны патрэбныя і для цеплатрас, і для нафтавай прамысловасці. Наогул "Алабуга" якраз і спецыялізуецца на машынабудаванні, нафтахіміі і палімернай прадукцыі. У гэтым моцная і Беларусь. Так што абмеркаваць агульныя падыходы да фарміравання такіх асаблівых эканамічных кластараў і падзяліцца вопытам (бо ў нас таксама ёсць і свабодныя эканамічныя зоны, і ПВТ, і "Вялікі камень") - пра гэта сёння гаварылі тут з беларускім прэм'ерам.

Кааперацыя - індыкатар паспяховасці сумесных праектаў

Кааперацыя як раз лепшы прыклад і індыкатар паспяховасці сумесных праектаў. Трактары "Беларус" збіраюць і прадаюць тут, у Татарстане, ужо не першы год. І гарантуюць яшчэ і сэрвіснае абслугоўванне. Рост продажаў летась плюс 30 % да 2019, а сёлета за квартал плюс 6,5 %. 1100 новенькіх "Беларусаў" раз'ехаліся па ўсіх палях рэспублікі.

Але не толькі трактары ў скарбонцы партнёрскіх сувязяў Беларусі і Татарстана. Тут збіраюць і нашы ліфты, ёсць дылерская сетка МАЗа, "Амкадора", Гомсельмаша, прадстаўніцтвы мэблевых кампаній і фірменныя магазіны лёгпрама. За два месяцы года мы нагандлявалі амаль на 175 мільёнаў долараў і рост да леташняга перыяду за 80 %. Так, пандэмія ў 2020 адбілася негатыўна. Зараз набіраем тэмп, але больш купляем, чым прадаём. А прапанаваць ёсць што. Таму час абмеркаваць стратэгію на год і далей.

З дамоўленасцяў па выніках: на базе МТЗ Татарстан будзе выпускаць камплектуючыя і збіраць яшчэ камунальную і дарожную тэхніку. Беспілотнікі і электратранспарт таксама будуць ствараць разам МАЗ і КамАЗ. Таксама мы гатовыя абнавіць і пасажырскі парк гарадоў рэспублікі, прапануем новыя мадэлі на газаматорным паліве. А для АПК камбайны і сумесныя распрацоўкі ў селекцыі.

Усё гэта будзе рухаць і рэгіянальнае супрацоўніцтва, і беларуска-расійскае ў цэлым. Самае актуальнае абмеркавалі сёння беларускі прэм'ер з расійскім калегам.

Агульныя праекты Беларусь і Расія абмяркуюць на Форуме рэгіёнаў у чэрвені. На кастрычнік запланаваны Вышэйшы дзяржсавет, а да яго збярэцца саюзны Саўмін.

Еўразійская інтэграцыя і двухбаковыя адносіны

Заўтра дыялог прэм'ераў будзе ўжо ў рамках пяці. Да Міжурадавага савета ў вузкім складзе некалькі і двухбаковых перамоў. А ўсе разам будуць абмяркоўваць эканоміку ЕАЭС. Унутраны рынак саюза, меры рэгулявання экспарту асобных тавараў, якія патрэбныя спажыўцам, і абарону сельгаспрадукцыі ад вірусных раслін. Шырокія і дзесьці больш ажыўленыя зносіны дэлегацый і ў кулуарах, магчымасць сам-насам абмеркаваць вострыя пытанні і знайсці рашэнне яшчэ да афіцыйнай часткі - гэта таксама плюс таго, што сустрэча ў Казані афлайн, а значыць у звыклым фармаце.