У Мінску стартаваў II Беларуска-Афрыканскі эканамічны форум

Пра шматвектарнасць нашай палітыкі і рост цікавасці да беларускай эканомікі гаворыць сённяшні дыялог беларуска-афрыканскіх партнёраў на эканамічным форуме. Удзел у маштабным мерапрыемстве прынялі каля 175 нашых кампаній і прадстаўнікі 14 афрыканскіх краін. Падстаў для сустрэчы сапраўды шмат. Сярод асноўных развіццё эканамічнага і экспартнага патэнцыялу, пошук новых пунктаў росту, умацаванне двухбаковых кантактаў. Дарэчы, беларуская прадукцыя займае трывалую нішу на рынках шматлікіх афрыканскіх краін. Амаль палова дзяржаў паўднёвага кантынента ведае нашы тавары ад харчавання да машынабудавання.

Цэнтральнай падзеяй форуму стала падпісанне пагаднення паміж гандлёва-прамысловымі палатамі Беларусі і ПАР. Гэты дакумент дае зялёнае святло для рэалізацыі шматлікіх праектаў у розных сферах: АПК, прамысловасць, будаўніцтва і адукацыя.

Аб тым, што Беларусь з'яўляецца надзейным і прадказальным палітычным і эканамічным партнёрам, гаварылі сёння і ў МЗС. Сустрэчу з афрыканскімі партнёрамі правёў Уладзімір Макей. Міністр пацвердзіў, што супрацоўніцтва з афрыканскімі краінамі з'яўляецца важным складальнікам шматвектарнага спектру знешняй палітыкі Беларусі. Апроч узаемавыгадных эканамічных праектаў, перспектыўнай сферай можа стаць перадача тэхналогій і аказанне інжынірынгавых паслуг, а таксама далейшае пашырэнне ўзаемадзеяння ў сферы адукацыі. "Афрыканскім партнёрам таксама можа быць цікавы беларускі вопыт у гарантаванні харчовай бяспекі", - адзначыў Уладзімір Макей.