У Ціндаа сёння адкрываецца саміт кіраўнікоў дзяржаў ШАС

Кітайскі Ціндаа стане ў гэтыя дні цэнтрам палітычнага жыцця. Сёння там адкрываецца саміт кіраўнікоў дзяржаў Шанхайскай арганізацыі супрацоўніцтва. Лідары ўпершыню сустрэнуцца ў фармаце "шанхайскай васьмёркі".

Для ўдзелу ў саміце з рабочым візітам у Кітай прыбыў Прэзідэнт Аляксандр Лукашэнка. Беларусь выкажа прапановы для развіцця арганізацыі і акрэсліць новыя кірункі супрацоўніцтва. Важны пункт - умацаванне бяспекі ў Еўразійскім рэгіёне. Наша краіна ў гэтым пытанні вядомая сваёй выразнай і паслядоўнай пазіцыяй. Таксама вядома, што беларускі лідар правядзе некалькі двухбаковых сустрэч з кіраўнікамі дзяржаў - удзельнікаў саміта. У іх ліку і перамовы са Старшынёй КНР Сі Цзіньпінам. Заяўленая тэматыка: умацаванне палітычнага супрацоўніцтва, рэалізацыя сумесных праектаў і міжрэгіянальнае ўзаемадзеянне.

Беларусь з 2015 года прымае ўдзел у гэтым прадстаўнічым форуме ў статусе назіральніка. Шанхайская арганізацыя супрацоўніцтва - найбуйнейшая інтэграцыя, якая аб'ядноўвае 8 дзяржаў: Расія, Кітай, Індыя, Казахстан, Пакістан, Кыргызстан, Таджыкістан і Узбекістан. У цэлым плошча краін, якія ўваходзяць у арганізацыю, займае 60 працэнтаў тэрыторыі Еўразіі. Агульная колькасць насельніцтва складае палову насельніцтва планеты. Шанхайская арганізацыя супрацоўніцтва не з'яўляецца ваенным блокам, а паслядоўна выступае за ўмацаванне стабільнасці, бяспекі і развіццё эканамічнага супрацоўніцтва.