VI Форум рэгіёнаў Беларусі і Расіі адкрываецца ў Санкт-Пецярбургу

Ад моладзевай палітыкі да развіцця турызму. Сёння ў Санкт-Пецярбургу адкрываецца VI Форум рэгіёнаў Беларусі і Расіі. У ім возьме ўдзел Прэзідэнт Аляксандр Лукашэнка. На працягу трох дзён удзельнікі абмяркуюць дзясяткі пытанняў, што датычацца прамысловага, навуковага, культурнага і бізнес-супрацоўніцтва дзвюх краін. Асаблівая ўвага сёлета моладзевым праектам.

Падрабязнасці з паўночнай сталіцы Расіі ў Дар'і Белавусавай-Пятроўскай. Па колькасці ўдзельнікаў VI Форум рэгіёнаў Беларусі і Расіі асабліва маштабны. У Санкт-Пецярбург прыбылі больш за 600 чалавек з абедзвюх краін. Гэта парламентарыі, кіраўнікі розных міністэрстваў і прамысловых прадпрыемстваў, навукоўцы і бізнесмены. Ад Беларусі ў рабоце форуму ўдзельнічаюць усе рэгіёны краіны, ад Расіі больш за 60.

Адна з ключавых тэм VI Форуму - паглыбленне інтэграцыі Саюзнай дзяржавы. Размова пойдзе аб сумесных навуковых, гуманітарных і культурных праектах. Асаблівая ўвага супрацоўніцтву бізнес-колаў. На форуме адбудзецца пасяджэнне дзелавых саветаў Беларусі і Расіі. Удзельнікі ўзнімуць пытанні раўнапраўнага доступу суб'ектаў да рынкаў і дзяржзакупак дзвюх краін, тэхнічнага рэгулявання і выхаду з сумеснымі праектамі на рынкі трэціх краін. У прыватнасці, гэта датычыцца беларускай машынабудаўнічай прадукцыі, дзе шмат расійскіх камплектуючых.

Галоўная асаблівасць VI Форуму рэгіёнаў - актыўны ўдзел у ім моладзі. Не выпадкова стартавы (або як гавораць нулявы) дзень форуму цалкам аддадзены рабоце самых юных дэлегатаў. Сёння ў Санкт-Пецярбургу пройдзе савет Моладзевай палаты пры Парламенцкім сходзе Саюза Беларусі і Расіі. У Санкт-Пецярбургу абмяркуюць і прамысловую кааперацыю. Гэта датычыцца стварэння беларуска-расійскага льнянога кластара. Таксама размова пойдзе наконт удзелу Беларусі ў праектах першага расійскага цэнтра штучнага інтэлекту, які хутка павінен з'явіцца ў горадзе на Няве.

Форум рэгіёнаў - гэта заўсёды цікавыя прапановы, якія прыводзяць да канкрэтных вынікаў. Напрыклад, летась было падпісана кантрактаў на 540 мільёнаў долараў. Мяркуючы па колькасці ўдзельнікаў, VI Форум рэгіёнаў павінен стаць яшчэ больш прадукцыйным.