Сустрэча міністраў замежных спраў СНД у Ашхабадзе. Пазіцыя і ініцыятывы Беларусі

Туркменістан рыхтуецца прыняць Савет кіраўнікоў дзяржаў СНД. Удзел у ім прыме і наш Прэзідэнт. Папярэднічае саміту лідараў Садружнасці сустрэча міністраў замежных спраў краін аб'яднання. Гэта традыцыйная практыка для кіраўнікоў знешнепалітычных ведамстваў. На сустрэчы прагучала пазіцыя Беларусі па шэрагу актуальных пытанняў, звязаных з гарантаваннем міру, бяспекі, эканамічнага развіцця ў нашай краіне і вакол яе ў Еўрапейскім рэгіёне і на постсавецкай прасторы. Партнёры па Садружнасці праінфармаваныя аб тых ініцыятывах, якія ў гэтай сувязі былі агучаны Прэзідэнтам Беларусі. Сярод важных тэм праект стратэгіі гарантавання інфармацыйнай бяспекі краін СНД.

Уладзімір Макей, Міністр замежных спраў Беларусі: "Сёння гэта тэма выходзіць у разрад прыярытэтных. Вы бачыце, якія прэтэнзіі прад’яўляюцца ў адносінах адна да адной шэрагам дзяржаў. Мы з'яўляемся сведкамі хакерскіх атак супраць не толькі нейкіх устаноў, але і цэлых краін. Таму гэта тэма будзе абмяркоўвацца і на пасяджэнні СМЗС, і на пасяджэнні Савета кіраўнікоў дзяржаў. І Беларусі ёсць аб чым праінфармаваць калег. У нас прынята адпаведная канцэпцыя інфармацыйнай бяспекі, існуе шэраг ініцыятыў, накіраваных на ўдасканаленне гэтай дзейнасці".

Па выніках зацверджана праграма дзеянняў па актывізацыі партнёрства паміж знешнепалітычнымі ведамствамі. Гэта дапаможа больш цесна каардынаваць дзейнасць на міжнароднай арэне. Усяго на сустрэчы міністраў замежных спраў Садружнасці быў разгледжаны дзясятак пытанняў. Сярод іх праект звароту кіраўнікоў дзяржаў СНД да народаў краін Садружнасці і сусветнай грамадскасці ў сувязі з 75-годдзем Перамогі савецкага народа ў Вялікай Айчыннай вайне. На саміце лідараў у Ашхабадзе чакаецца прыняцце дэкларацыі аб стратэгічным эканамічным супрацоўніцтве краін СНД.

На парадку дня сустрэчы лідараў СНД і ўзаемадзеянне ў праваахоўнай і ваеннай галінах, тэма барацьбы з тэрарызмам і экстрэмізмам. Аляксандр Лукашэнка на палях саміту традыцыйна правядзе серыю перамоў з замежнымі калегамі па тэматыцы двухбаковага супрацоўніцтва.