Пасяджэнне Еўразійскага міжурадавага савета сёння пройдзе ў Мінску

Мінск сёння - перагаворная пляцоўка прэм'ераў краін еўразійскай "пяцёркі". Да пачатку міжурадавага савета застаецца літаральна паўтары гадзіны. Пасяджэнні пройдуць у вузкім і пашыраным саставах. Таксама ў праграме і шэраг двухбаковых сустрэч.

Больш падрабязна аб парадку дня ведае наш карэспандэнт Антон Малюта. Cюды, у "Прэзідэнт-Гатэль" удзельнікі пачнуць прыбываць за лічаныя хвіліны. Тое, што пасяджэнне міжурадавага савета пройдзе ў вочным фармаце, зараз асабліва значна. Гэта добрая магчымасць асабіста абмеркаваць надзённыя пытанні. Частку з іх, нагадаю, прэзідэнты пераадрасавалі ўрадам пасля саміту на вышэйшым узроўні ў маі. Беларусь зараз старшынствуе ў ЕАЭС. І гэта абнадзейвае: што будуць знойдзены рашэнні, выгадныя для ўсіх на шляху інтэграцыі "пяцёркі". Галоўнае - адсутнасць бар'ераў і роўныя ўмовы - тое, за што выступаем з самага пачатку саюза.

Нагадаем, наш прэм'ер Раман Галоўчанка яшчэ ў аўторак на сустрэчы з расійскім калегам Міхаілам Мішусціным заявіў, што ў парадку дня пасяджэння савета будуць толькі практычныя пытанні, гэта значыць у прыярытэце эканоміка. Першым чынам гандаль, канкурэнцыя і прамысловасць. Да разгляду плануюць і важны для ўсёй “пяцёркі” праект - карту індустрыялізацыі. Гэта лічбавая платформа ў дапамогу бізнесу і дзяржпрадпрыемствам для пошуку новых партнёраў. Яна дапаможа адысці ад дубліравання вытворчасцяў і нарасціць гандаль у трэція краіны.

Варта адзначыць, патэнцыял у ЕАЭС вялікі. Першае месца па тэрыторыі ў свеце, 180 мільёнаў чалавек насельніцтва і ВУП 2 трыльёны долараў. Ну а каб працаваць на поўную сілу, трэба вырашыць усе спрэчныя пытанні і ўзгадніць прававую базу. Чарговая магчымасць - менавіта сёння.