8 кастрычніка Лукашэнка возьме ўдзел у саміце СНД і выступіць на тэму 80-годдзя Перамогі
Прэзідэнт Беларусі Аляксандр Лукашэнка возьме сёння ў Маскве ўдзел у пасяджэнні Савета кіраўнікоў дзяржаў - удзельнікаў СНД, паведамляе БЕЛТА.
Кіраўнік дзяржавы прыбыў у Маскву напярэдадні і вечарам 7 кастрычніка прыняў удзел у нефармальнай сустрэчы лідараў краін СНД.
Парадак дня саміту вельмі шырокі. Чакаецца, што лідары краін Садружнасці прымуць рашэнні па пытаннях, звязаных з гарантаваннем бяспекі, сферай высокіх тэхналогій, гандлёва-эканамічным і культурна-гуманітарным супрацоўніцтвам.
Аляксандр Лукашэнка выступіць з дакладам па пункце парадку дня, звязаным з прыняццем Звароту да народаў краін Садружнасці і сусветнай грамадскасці ў сувязі з 80-годдзем Перамогі савецкага народа ў Вялікай Айчыннай вайне 1941-1945 гадоў. Такое рашэнне было прынята ў сувязі з тым, што Беларусь з рэспублік былога СССР з'яўляецца адной з найбольш пацярпелых у гады Вялікай Айчыннай вайны.
Зварот накіраваны на захаванне памяці аб вайне, тым подзвігу, які народы СССР унеслі ў Вялікую Перамогу. У ім таксама гаворыцца аб неабходнасці рабіць сумесныя крокі па процідзеянні гераізацыі нацыстаў і іх памагатых, аб захаванні памяці і мемарыялаў у гонар герояў Вялікай Айчыннай вайны. Пасля прыняцця гэты зварот будзе распаўсюджаны на пляцоўцы ААН і іншых міжнародных арганізацый.
Акрамя таго, на пасяджэнні плануецца прыняць рашэнне аб заснаванні ганаровага звання СНД "Горад працоўнай славы. 1941-1945 гады".
Кіраўнікі дзяржаў абмяняюцца меркаваннямі аб узаемадзеянні ў рамках СНД, прымуць рашэнне аб старшынстве ў Садружнасці ў 2025 годзе. Чакаецца, што пасля Расіі абавязкі старшыні ў Садружнасці возьме на сябе Таджыкістан, а чарговае пасяджэнне Савета кіраўнікоў дзяржаў правядуць у кастрычніку наступнага года ў Душанбэ.
На саміце таксама плануецца разгледзець пытанне наконт дзейнасці Міжпарламенцкай асамблеі дзяржаў - удзельнікаў Садружнасці Незалежных Дзяржаў па ўмацаванні інтэграцыйнага супрацоўніцтва і іншыя пытанні парадку дня.
Кіраўнікі дзяржаў падпішуць рашэнні аб аб'ўленні культурных сталіц Садружнасці на найбліжэйшыя тры гады. Плануецца, што на 2027 год такі статус атрымае Маладзечна, а ў 2025 і 2026 гадах гэта будуць азербайджанскі Лачын і армянскі Мегры.
Удзельнікі саміту прымуць папраўкі ў шэраг дакументаў, што датычацца ўзаемадзеяння ў прававой галіне, а таксама ў сферы гарантавання бяспекі. Чакаецца, што на пасяджэнні будзе прыняты шэраг заяў кіраўнікоў дзяржаў - удзельнікаў Садружнасці Незалежных Дзяржаў.