Аляксандр Лукашэнка: Віцебскі фэст служыць высакародным мэтам

На сцэне Летняга амфітэатра адбылося ўрачыстае адкрыццё "Славянскага базару".

Віцебскі фэст служыць высакародным мэтам. Аб гэтым сёння гаварыў Прэзідэнт Аляксандр Лукашэнка, звяртаючыся да гасцей форуму. Кіраўнік дзяржавы асабліва адзначыў пануючую тут унікальную атмасферу міжнацыянальнага сяброўства, якая існуе па-за дзяржаўнымі межамі, па-за палітычнымі і рэлігійнымі поглядамі і перакананнямі. Цяперашні фэст сабраў на берагах Заходняй Дзвіны прадстаўнікоў больш чым з 40 краін.

Аляксандр Лукашэнка штогод прысутнічае на адкрыцці гэтага маштабнага міжнароднага фэсту мастацтваў. На ўрачыстай цырымоніі Кіраўнік беларускай дзяржавы па традыцыі ўручыў спецыяльную ўзнагароду "Праз мастацтва - да міру і паразумення". У гэты раз яе лаўрэатам стала савецкая і казахстанская эстрадная спявачка, актрыса, педагог-прафесар, народная артыстка Казахстана Роза Рымбаева. Спецыяльны прыз "Залатую ліру" ва ўзнагароду з рук Аляксандра Лукашэнкі атрымаў уладальнік Гран-пры 16-га Міжнароднага дзіцячага музычнага конкурсу "Віцебск-2018". Ім стаў юны артыст з Украіны Аляксандр Балабанаў. Нагадаем, урачыстая цырымонія адкрыцця "Славянскага базару ў Віцебску" - сёння ў 22:00 на тэлеканале "Беларусь 1".