Аляксандр Лукашэнка даў інтэрв'ю міжнароднаму інфармацыйнаму агенцтву "Расія сёння"

30 лістапада Прэзідэнт Беларусі даў інтэрв'ю міжнароднаму інфармацыйнаму агенцтву "Расія сёння". Аляксандр Лукашэнка адказаў на пытанні вядомага расійскага журналіста і тэлевядучага, кіраўніка інфармагенцтва Дзмітрыя Кісялёва.

Размова працягвалася дзве з паловай гадзіны і закранула найважнейшыя тэмы саюзнага, міжнароднага і ўнутрыбеларускага парадку дня. У прыватнасці, Прэзідэнт даў ацэнку двухбаковым адносінам Беларусі і Расіі, распавёў аб інтэграцыі ў рамках Саюзнай дзяржавы. Таксама ў цэнтры ўвагі былі міграцыйны крызіс на мяжы з Еўрасаюзам, канстытуцыйная рэформа ў нашай краіне, іншыя пытанні. Пасля размовы Дзмітрый Кісялёў прызнаўся, што гэта была захапляльна цікавая размова. Інтэрв'юер адзначыў шчырасць Прэзідэнта. Яму імпанавала і тое, што тэматыка пытанняў загадзя не ўзгаднялася, а час інтэрв'ю нічым не абмяжоўваўся. Дзмітрый Кісялёў падзяліўся і іншымі ўражаннямі ад размовы з беларускім лідарам, адзначыўшы, што гэта яго першае інтэрв'ю з Аляксандрам Лукашэнкам.

Дзмітрый Кісялёў добра вядомы не толькі расійскай, але і беларускай публіцы. Ужо 9 гадоў ён узначальвае міжнароднае інфармагенцтва "Расія сёння". Яно сярод лідараў па цытаванасці сярод расійскіх СМІ. Холдынг аб'ядноўвае радыёвяшчанне, навінавыя стужкі, інфармацыйныя парталы. Агенцтва кругласутачна выпускае каля 5 тысяч арыгінальных матэрыялаў у фарматах навінавых стужак, радыёпраграм, артыкулаў на інфармацыйных рэсурсах. Гэта забяспечвае вялікі ахоп аўдыторыі на 30 мовах свету. Дзмітрый Кісялёў запэўніў, што інтэрв'ю з нашым Прэзідэнтам выйдзе ледзь ці не на ўсіх рэсурсах расійскага медыяхолдынга.